ശ്രീകണ്ഠപുരം: സര്‍ക്കാര്‍ സ്‌കൂളുകളില്‍ ഭാഷാധ്യാപകരുടെ നിയമനം വൈകുന്നതായി പരാതി. ജില്ലയിലെ മിക്ക സ്‌കൂളുകളിലും അറബിക്, സംസ്‌കൃതം, ഉര്‍ദു അധ്യാപക തസ്തികകള്‍ ഒഴിഞ്ഞുകിടക്കുകയാണ്. പി.എസ്.സി ലിസ്റ്റില്‍ ഇല്ലെങ്കില്‍ എംപ്ലോയ്‌മെന്റ് വഴി നിയമിക്കണമെന്നും അല്ലെങ്കില്‍ സ്‌കൂള്‍ പ്രധാനധ്യാപകര്‍ പത്രവാര്‍ത്ത നല്‍കി നിയമിക്കണമെന്നുമാണ് ഉത്തരവ്. പ്രധാനധ്യാപകര്‍ താല്‍കാലിക നിയമനങ്ങള്‍ നടത്തുന്നത് വിലക്കികൊണ്ടുള്ള ഉത്തരവ് കഴിഞ്ഞ സര്‍ക്കാര്‍ ഇറക്കിയിരുന്നു. എംപ്ലോയ്‌മെന്റ് എകസ്‌ചേഞ്ച് മുഖേന നിയമനം നടത്താനായിരുന്നു നിര്‍ദേശം. മിക്ക സ്ഥലങ്ങളിലും നിയമനം നടന്നില്ല. അതിനാല്‍ പ്രധാനധ്യാപകര്‍ താല്‍കാലിക നിയമനങ്ങള്‍ നടത്തുകയാണ് ചെയ്തത്. ഇക്കാര്യത്തില്‍ അവ്യക്തത നിലനില്‍ക്കുന്നതിനാല്‍ ആശയക്കുഴപ്പത്തിലാണ് സ്‌കൂള്‍ അധികൃതര്‍.