ഇസ്‌ലാമാബാദ്: പാകിസ്താന് നേരെ ഇറാന്‍ നടത്തിയ മോര്‍ട്ടാര്‍ ആക്രമണത്തില്‍ യുവാവ് കൊല്ലപ്പെട്ടു. തെക്ക് പടിഞ്ഞാറന്‍ ബലൂചിസ്ഥാന്‍ പ്രവിശ്യയിലെ പന്‍ജ്ഗര്‍ ജില്ലയിലാണ് സംഭവം. ഇതു രണ്ടാംതവണയാണ് ഇറാനില്‍ നിന്ന് പാകിസ്താനിലേക്ക് ഒരാഴ്ചയ്ക്കിടെ ആക്രമണമുണ്ടാകുന്നത്.
വാഹനത്തിനു മുകളിലാണ് മോര്‍ട്ടാര്‍ ഷെല്‍ പതിച്ചതെന്ന് പൊലിസ് അറിയിച്ചു. വാഷുക് സ്വദേശി കം ജന്‍ എന്നയാളാണ് കൊല്ലപ്പെട്ടത്. വാഹനം പൂര്‍ണമായി തകര്‍ന്നു. മരിച്ചയാളുടെ മൃതദേഹം ആശുപത്രിയിലേക്ക് മാറ്റി. സംഭവത്തെ കുറിച്ച് അന്വേഷണം ആരംഭിച്ചതായി പൊലിസ് അറിയിച്ചു. ഒരാഴ്ച മുന്‍പും ഇറാന്‍ അഞ്ചു തവണ പാകിസ്താനിലേക്ക് ആക്രമണം നടത്തിയിരുന്നു. കഴിഞ്ഞ മാസം 26 ന് മേഖലയിലുണ്ടായ സംഘര്‍ഷത്തില്‍ 10 ഇറാന്‍ അതിര്‍ത്തി രക്ഷാസേനാ അംഗങ്ങള്‍ കൊല്ലപ്പെട്ടിരുന്നു. തുടര്‍ന്നാണ് ഇറാന്‍ തിരിച്ചടി തുടങ്ങിയത്.