മാഹി: മദ്യഷോപ്പ് പൂട്ടിച്ച ജനകീയ കൂട്ടായ്മ പ്രവര്‍ത്തകരെ പൊലിസ് അറസ്റ്റുചെയ്തു. മഞ്ചക്കലിലെ സാദിഖ്, മാഹി ശിശിരത്തില്‍ റഫീഖ് എന്നിവരെയാണ് പൊലിസ് അറസ്റ്റുചെയ്തത്.
സംഭവത്തില്‍ പ്രതിഷേധിച്ച് ജനകീയ കൂട്ടായ്മയുടെ നേതൃത്വത്തില്‍ ഇന്നലെ മാഹിയില്‍ ഹര്‍ത്താല്‍ ആചരിച്ചു.
മാഹി ഐ.കെ കുമാരന്‍ മാസ്റ്റര്‍ റോഡില്‍ വെള്ളിയാഴ്ച പ്രവര്‍ത്തനം തുടങ്ങാനിരുന്ന രണ്ടു മദ്യഷോപ്പുകളാണു ജനകീയ കൂട്ടായ്മ പ്രവര്‍ത്തകരുടെ സമരത്തിനൊടുവില്‍ പൂട്ടിച്ചത്. ജനവാസ കേന്ദ്രങ്ങളിലേക്കു പുതിയ മദ്യഷോപ്പുകള്‍ കൊണ്ടുവരുന്നതിനെതിരേ ഉയരുന്ന ജനരോഷത്തെ പൊലിസിനെ ഉപയോഗിച്ച് തകര്‍ക്കാന്‍ ശ്രമിക്കുന്നതു പ്രതിഷേധാര്‍ഹമാണെന്നു ജനശബ്ദം മാഹി പ്രവര്‍ത്തക സമിതി ചൂണ്ടിക്കാട്ടി. ചാലക്കര പുരുഷു അധ്യക്ഷനായി. ടി.എം സുധാകരന്‍, ദാസന്‍ കാണി, വി.എം അശോകന്‍, ടി.എ ലത്തീഫ് സംസാരിച്ചു.