സ്വന്തം ലേഖകന്‍
തിരുവനന്തപുരം: പുതിയ കൗണ്‍സിലര്‍മാരുടെ സത്യപ്രതിജ്ഞാ ചടങ്ങിനിടെ തിരുവനന്തപുരം കോര്‍പറേഷന്‍ കൗണ്‍സില്‍ ഹാളില്‍ ജയ് ശ്രീറാം വിളിയുമായി ബി.ജെ.പി പ്രവര്‍ത്തകര്‍. സത്യപ്രതിജ്ഞാ ചടങ്ങുകള്‍ അവസാനിക്കാറായപ്പോഴാണ് ജയ് ശ്രീറാം വിളി ഉയര്‍ന്നത്. സത്യപ്രതിജ്ഞയ്ക്കിടെ വന്ദേമാതരം, ഭാരത് മാതാ കി ജയ്, വിപ്ലവാഭിവാദ്യങ്ങള്‍, ജയ് ഹിന്ദ് തുടങ്ങിയ മുദ്രാവാക്യങ്ങളും കൗണ്‍സിലര്‍മാര്‍ ഉയര്‍ത്തിയിരുന്നു. കൂടാതെ, ദൈവനാമത്തിലെ സത്യപ്രതിജ്ഞ എന്നതിന് പകരം വിവിധ മത നാമങ്ങള്‍ നിറഞ്ഞ സത്യപ്രതിജ്ഞകളും കൗണ്‍സില്‍ ഹാളില്‍ മുഴങ്ങി. സത്യപ്രതിജ്ഞാ ചടങ്ങിനിടെ സി.പി.എം, ബി.ജെ.പി പ്രവര്‍ത്തകര്‍ മത്സരിച്ച് പാര്‍ട്ടി മുദ്രാവാക്യങ്ങളും മുഴക്കിയിരുന്നു. ഇതിന് പിന്നാലെയാണ് ബി.ജെ.പി പ്രവര്‍ത്തകര്‍ ജയ് ശ്രീരാം വിളിച്ചത്.