കൊണ്ടോട്ടി: കരിപ്പൂര്‍ വിമാനത്താവളം വഴി കടത്താന്‍ ശ്രമിച്ച 835 ഗ്രാം സ്വര്‍ണം കോഴിക്കോട് കസ്റ്റംസ് പ്രിവന്റീവ് വിഭാഗം പിടികൂടി. വയനാട് റിപ്പണ്‍ സ്വദേശി വാകേരി അബ്ദുള്‍ നാസറാണ് കസ്റ്റംസിന്റെ പിടിയിലായത്. സ്വര്‍ണം പൊടിച്ച് ഗര്‍ഭനിരോധന ഉറകളില്‍ പൊതിഞ്ഞ് ശരീരത്തില്‍ ഒളിപ്പിച്ച് കടത്തുകയായിരുന്നു. പിടികൂടിയവയ്ക്ക് 22 ലക്ഷം രൂപ വില ലഭിക്കും.
ഇന്നലെ രാവിലെ 9.50ന് ദുബൈയില്‍ നിന്നുള്ള എയര്‍ഇന്ത്യ എക്‌സ്പ്രസ് വിമാനത്തിലാണ് ഇയാള്‍ കരിപ്പൂരിലെത്തിയത്. രഹസ്യവിവരം ലഭിച്ചതിനെ തുടര്‍ന്ന് ഇയാളെ തടഞ്ഞ് ചോദ്യം ചെയ്യുകയായിരുന്നു. കസ്റ്റംസ് ഡെപ്യൂട്ടി കമ്മിഷണര്‍ ഇ.എസ് നിഥിന്‍ലാല്‍, സൂപ്രണ്ടുമാരായ എം.പ്രവീണ്‍, കെ.സുധീര്‍, ഇന്‍സ്‌പെക്ടര്‍മാരായ കെ.കെ പ്രവീണ്‍കുമാര്‍, ഇ.മുഹമ്മദ് ഫൈസല്‍,സന്തോഷ് ജോണ്‍, എം.സന്തോഷ് കുമാര്‍ എന്നിവരടങ്ങിയ സംഘമാണ് കള്ളക്കടത്ത് പിടികൂടിയത്.