ആലപ്പുഴ: പട്ടണക്കാട്ട് മൂന്നര സെന്റ് സ്ഥലത്ത് താമസിക്കുന്ന വ്യക്തിയുടെ കുടുംബത്തിന് ഭീഷണിയായ ജല അതോറിറ്റിയുടെ വാട്ടര്‍ ടാങ്ക് ഉടന്‍ പൊളിച്ചു നീക്കണമെന്ന് സംസ്ഥാന മനുഷ്യകാശ കമ്മിഷന്‍.
ജല അതോറിറ്റി എക്‌സിക്യൂട്ടീവ് എന്‍ജിനീയര്‍ക്കും ആര്‍.ഡി.ഒക്കുമാണ് കമ്മിഷന്‍ ജുഡിഷ്യല്‍ അംഗം പി. മോഹനദാസ് ഉത്തരവ് നല്‍കിയത്. പട്ടണക്കാട് കളത്തില്‍ ഹൗസില്‍ കെ.കെ. കൃഷ്ണകുമാര്‍ നല്‍കിയ പരാതിയിലാണ് നടപടി. കാലപഴക്കമുള്ള വാട്ടര്‍ടാങ്ക് ജീര്‍ണിച്ച അവസ്ഥയിലാണെന്ന് പരാതിയില്‍ പറയുന്നു. 2015 ഡിസംബര്‍ 4 ന് ആലപ്പുഴ ആര്‍.ഡി.ഒ ടാങ്ക് പൊളിച്ചുമാറ്റണമെന്ന് ഉത്തരവ് നല്‍കിയെങ്കിലും നടപടിയെടുത്തില്ല. പഞ്ചായത്ത് സെക്രട്ടറിക്ക് പരാതി നല്‍കിയിട്ടും നടപടിയെടുത്തില്ല. പരാതിക്കാരന്റെ വീടിന് സമീപമുള്ള പമ്പ് ഹൗസും പൊളിച്ചു മാറ്റേണ്ടതാണെന്ന് ജല അതോറിറ്റി കമ്മീഷനെ അറിയിച്ചു. പമ്പ് ഹൗസ് പൊളിക്കാനുള്ള അനുവാദം കിട്ടുന്ന മുറയ്ക്ക് നടപടിയെടുക്കാമെന്നും റിപ്പോര്‍ട്ടില്‍ പറയുന്നു.
ആര്‍.ഡി.ഒ കോടതി ഉത്തരവ് അധികൃതര്‍ മാനിച്ചിട്ടില്ലെന്ന് കമ്മിഷന്‍ ഉത്തരവില്‍ പറഞ്ഞു. മൂന്നു വര്‍ഷം കഴിഞ്ഞിട്ടും നടപടിയെടുക്കാത്തത് അധികൃതരുടെ അനാസ്ഥയാണ്. ജലഅതോറിറ്റി ഉദ്യോഗസ്ഥരുടെ അനാസ്ഥ കാരണം അപകടം സംഭവിച്ചാല്‍ ഉദ്യോഗസ്ഥര്‍ ഉത്തരവാദികളാകുമെന്നും മൂന്നു വര്‍ഷത്തെ കാലതാമസം അനുവദനീയമല്ലെന്നും ഉത്തരവില്‍ പറഞ്ഞു. ഉത്തരവ് നടപ്പിലാക്കി മൂന്നു മാസത്തിനകം അറിയിക്കണമെന്ന് കമ്മിഷന്‍ ആവശ്യപ്പെട്ടു.