ഗൂഡല്ലൂര്‍: സ്‌കൂള്‍ അധ്യായന വര്‍ഷം ആരംഭിക്കാനിരിക്കെ നീലഗിരിയില്‍ സ്‌കൂള്‍ ബസുകളുടെ പരിശോധന ശക്തമാക്കി.
ഇതിനകം ആറു ബസുകളുടെ അംഗീകരാം റദ്ദാക്കിയിട്ടുണ്ട്. ഗൂഡല്ലൂര്‍ വിദ്യാഭ്യാസ ജില്ലയിലെ ഗൂഡല്ലൂര്‍, പന്തല്ലൂര്‍ താലൂക്കുകളിലെ പ്രൈവറ്റ് സ്‌കൂള്‍ ബസുകള്‍ പരിശോധന നടത്തിയതിലാണ് ആറു ബസുകളുടെ അംഗീകാരം റദ്ദാക്കിയത്.
ഈ ബസുകള്‍ അപാകതകള്‍ പരിഹരിച്ച ശേഷം പരിശോധന നടത്തി ഫിറ്റ്‌നസ് സര്‍ട്ടിഫിക്കറ്റ് നല്‍കുമെന്ന് ആര്‍.ടി.ഒ ഷണ്‍മുഖ സന്ദരം പറഞ്ഞു. ഗൂഡല്ലൂര്‍ യതീംഖാന മൈതാനത്ത് നടന്ന പരിശോധനയില്‍ 42 ബസുകളാണ് പരിശോധിച്ചത്.
ഗൂഡല്ലൂര്‍ ഡി.എസ്.പി രവിശങ്കര്‍, തഹസില്‍ദാര്‍ ഇന്നാച്ചി മുത്തു തുടങ്ങിയവര്‍ പരിശോധനക്ക് നേതൃത്വം നല്‍കി.