ചെങ്ങന്നൂര്‍: ശബരിമല യുവതിപ്രവേശവുമായി ബന്ധപ്പെട്ട് സുപ്രിംകോടതി വിധിക്കെതിരേ നടത്തുന്ന സമരങ്ങള്‍ക്ക് കെ.പി.സി.സി പിന്തുണക്കുമെന്ന് വര്‍ക്കിങ് പ്രസിഡന്റ് കൊടിക്കുന്നില്‍ സുരേഷ് എം.പി അറിയിച്ചു. ഇതിനായി പന്തളത്ത് കൊട്ടാരത്തിലെത്തി കൊട്ടാരം നിര്‍വാഹക സമിതി പ്രസിഡന്റ് പി.ജി ശശികുമാര വര്‍മയെ സന്ദര്‍ശിച്ച് കെ.പി.സി.സിയുടെ പിന്‍തുണ അറിയിച്ചതായും കൊടിക്കുന്നില്‍ പറഞ്ഞു.
ശബരിമല യുവതി പ്രവേശനത്തെ സംബന്ധിച്ച് സുപ്രിംകോടതി വിധി മറികടക്കാന്‍ പാര്‍ലമെന്റില്‍ നിയമനിര്‍മാണം നടത്തണമെന്നും കൊടിക്കുന്നില്‍ പറഞ്ഞു. പാര്‍ലമെന്റിലെ ശീതകാല സമ്മേളനത്തില്‍ കേന്ദ്ര സര്‍ക്കാര്‍ നിയമ ഭേദഗതി അവതരിപ്പിച്ച് പാസാക്കണം. അതുവരെ വിധി നടപ്പാക്കാതിരിക്കാന്‍ രാഷ്ട്രപതി ഓര്‍ഡിനന്‍സ് പുറപ്പെടുവിക്കണം. നാളുകളായി വിവിധ മതങ്ങളില്‍ നിലനില്‍ക്കുന്ന ആചാര അനുഷ്ഠാനങ്ങള്‍ കോടതിയില്‍ ചോദ്യം ചെയ്യപ്പെടുകയും അനുകൂല വിധി സംബാധിക്കുവാനുള്ള നീക്കം ഗൂഢതാല്‍പര്യം സംരക്ഷിക്കുവാനുള്ളതാണ്. ഇതിന് നിയമനിര്‍മാണം ആവശ്യമാണ്.
സുപ്രിംകോടതി വിധിക്കെതിരേ റിവ്യൂ ഹരജി നല്‍കുന്നതുകൊണ്ട് ഗുണമില്ല. ഇപ്പോള്‍ വിധി പറഞ്ഞ അതേ ജഡ്ജിമാര്‍ തന്നെയാണ് ഇതിനു മേല്‍ തീരുമാനം എടുക്കേണ്ടിവരുകയെന്നും അദ്ദേഹം വാര്‍ത്താസമ്മേളനത്തില്‍ പറഞ്ഞു.