പീരുമേട്:  സര്‍ക്കാര്‍ നിരോധനം നടപ്പായാല്‍ പെരുവന്താനം കൊടികുത്തിയിലെ കാലിച്ചന്തയുടെയും പ്രവര്‍ത്തനം നിലയ്ക്കും.
മധ്യതിരുവിതാംകൂറിലെ പ്രധാന കാലിവ്യാപാരം നടക്കുന്ന ഇവിടെ ആഴ്ചതോറും 1000  1500 ഉരുക്കളുടെ ലേലമാണു നടക്കുന്നത്.
ആന്ധ്രയില്‍നിന്നു ട്രെയിന്‍മാര്‍ഗം തമിഴ്‌നാട്ടില്‍ എത്തിക്കുന്ന കാലികളെ ലോറികളിലാണു കൊടികുത്തി കാളച്ചന്തയിലേക്ക് എത്തിക്കുന്നത്.
കോട്ടയം, ഇടുക്കി ജില്ലകളിലെ വന്‍കിട  ചെറുകിട കശാപ്പുശാല നടത്തിപ്പുകാരും മറ്റും ഉള്‍പ്പെടെ ലേലംകൊള്ളാന്‍ പതിവായി ഇവിടെ എത്തുന്നുണ്ട്. വ്യാഴാഴ്ചകളിലാണു ലേലം.
ബുധനാഴ്ച രാത്രിയോടെതന്നെ കാലികളെ ഇവിടെ എത്തിക്കും. വ്യാഴാഴ്ചകളില്‍ പുലര്‍ച്ചെ ആരംഭിക്കുന്ന ഇടപാടുകള്‍ ഉച്ചയോടെ അവസാനിക്കും.
ശാരാശരി 60 ലക്ഷം രൂപയുടെ കച്ചവടമാണ് ആഴ്ചതോറും ചന്തയില്‍ നടക്കുന്നത്. നികുതിയിനത്തില്‍ പെരുവന്താനം പഞ്ചായത്തിനു ലഭിക്കുന്ന വന്‍ വരുമാനം കേന്ദ്രസര്‍ക്കാര്‍ നടപടിയിലൂടെ നഷ്ടമാകും.