കാസര്‍കോട്: പട്ടിക്കാട് ജാമിഅ നൂരിയ്യ അറബിക് കോളജ് മത പ്രബോധന സംവിധാനങ്ങള്‍ രൂപപ്പെടുത്തുന്നതിനായി ആവിഷ്‌കരിച്ച ശിഹാബ് തങ്ങള്‍ സെന്റര്‍ ഫോര്‍ ഇസ്‌ലാമിക് സ്റ്റഡീസിന്റെ ഉദ്ഘാടനവും ദീര്‍ഘകാലം സ്ഥാപനത്തിന്റെ പ്രസിഡന്റായി പ്രവര്‍ത്തിച്ച ശിഹാബ് തങ്ങളുടെ അനുസ്മരണ സെമിനാറും ഓഗസ്റ്റ് ഒന്നിനു മംഗളൂരു ടൗണ്‍ ഹാളില്‍ നടക്കുമെന്ന് സംഘാടകര്‍ വാര്‍ത്താസമ്മേളനത്തില്‍ അറിയിച്ചു. ദക്ഷിണ കര്‍ണാടകയില്‍ നടക്കുന്ന നാഷണല്‍ മിഷന്‍ രാജ്യമൊട്ടാകെ കേരള മോഡല്‍ ദഅ്‌വാ സംവിധാനം രൂപപ്പെടുത്തുന്നതിനു പുറമെ ശ്രദ്ധേയമായ ജീവകാരുണ്യ പദ്ധതികളും നടപ്പാക്കും.
നാഷണല്‍ മിഷന്‍ പ്രോഗ്രാമില്‍ പാണക്കാട് സയ്യിദ് ഹൈദരലി ശിഹാബ് തങ്ങള്‍, പ്രൊഫ.കെ ആലിക്കുട്ടി മുസ്‌ലിയാര്‍, സയ്യിദ് സ്വാദിഖലി ശിഹാബ് തങ്ങള്‍, പി.കെ കുഞ്ഞാലിക്കുട്ടി, ഇ.ടി മുഹമ്മദ് ബഷീര്‍, മുന്‍ കേന്ദ്ര ന്യൂനപക്ഷ മന്ത്രി കെ.എ റഹ്മാന്‍, കര്‍ണാടക വനം മന്ത്രി വി രാമനാഥ റൈ, അബ്ദുല്‍ സമദ് സമദാനി, ഓണംപള്ളി മുഹമ്മദ് ഫൈസി തുടങ്ങിയവര്‍ വിവിധ സെഷനുകളില്‍ സംബന്ധിക്കും. ദേശീയതലത്തില്‍ നിന്നുള്ള നാലായിരം പ്രതിനിധികള്‍ ചടങ്ങില്‍ സംബന്ധിക്കും.
വാര്‍ത്താസമ്മേളനത്തില്‍ ഖാസി പ്രൊഫ. കെ ആലിക്കുട്ടി മുസ്‌ലിയാര്‍, ചെര്‍ക്കളം അബ്ദുല്ല എന്നിവര്‍ സംബന്ധിച്ചു.