രാജപുരം: ഫോറസ്റ്റുകാരുടെ വിളി കേള്‍ക്കാന്‍ വിപിന്‍ ഇനിയില്ല. കാഞ്ഞങ്ങാട് ഫോറസ്റ്റ് റെയ്ഞ്ചിനു കീഴില്‍ ഉഗ്രവിഷമുള്ള പാമ്പുകളെ കണ്ടെത്തിയാല്‍ ആദ്യം തേടുക വിപിന്‍ എന്ന യുവാവിനെയായിരുന്നു. വൃക്ക സംബന്ധമായ അസുഖത്തെത്തുടര്‍ന്ന് മംഗളൂരുവില്‍ ചികിത്സയിലിരിക്കെ ഇന്നലെ പുലര്‍ച്ചെയാണ് മരണത്തിനുകീഴടങ്ങിയത്. കര്‍മമണ്ഡലങ്ങളില്‍ തന്റെ ദൗത്യം നിര്‍വഹിച്ചു കൊണ്ടിരിക്കെ പനി ബാധിച്ചതോടെയാണ് രോഗം തിരിച്ചറിഞ്ഞത്. വനം വകുപ്പിന്റെ നിര്‍ദേശത്തെത്തുടര്‍ന്ന് ആലപ്പുഴയില്‍ സേവനം നടത്തുകയായിരുന്നു.
പ്രളയാനന്തരം വീടുകളില്‍ ഇഴ ജന്തുക്കളുടെ ശല്യം ഏറിയതിനാല്‍ പാമ്പുപിടുത്തക്കാരുടെ കൂട്ടത്തില്‍ വിപിനും ആലപ്പുഴയിലെത്തിയതായിരുന്നു. അവിടെവച്ചാണ് പനി ബാധിച്ചത്. റാണിപുരത്ത് രണ്ടുമാസം മുമ്പ് കണ്ടെത്തിയ രാജവെമ്പാലയെ പിടികൂടിയതും വിപിന്‍ തന്നെയായിരുന്നു.
മംഗളൂരുവിലെ ചികിത്സക്ക് നല്ലൊരു തുക ചെലവാക്കിയെങ്കിലും ജീവന്‍ രക്ഷിക്കാനായില്ല. സാമ്പത്തികമായി ഏറെ പിന്നാക്കം നില്‍ക്കുന്ന വിപിന്റെ കുടുംബം ആ തുക കണ്ടെത്താന്‍ ഏറെ പാടുപെട്ടിരുന്നു. മംഗളൂരുവിലെ പൊതുപ്രവര്‍ത്തകര്‍ സഹായത്തിനെത്തിയിരുന്നു.