ലണ്ടന്‍: ചാംപ്യന്‍സ് ട്രോഫിക്ക് മുന്നോടിയായുള്ള സന്നാഹ മത്സരത്തില്‍ ശ്രീലങ്കക്കെതിരേ ആസ്‌ത്രേലിയക്ക് രണ്ട് വിക്കറ്റിന്റെ വിജയം. ആദ്യം ബാറ്റ് ചെയ്ത ശ്രീലങ്ക 50 ഓവറില്‍ ഏഴ് വിക്കറ്റ് നഷ്ടത്തില്‍ 318 റണ്‍സെടുത്തപ്പോള്‍ ആസ്‌ത്രേലിയ 49.4 ഓവറില്‍ എട്ട് വിക്കറ്റ് നഷ്ടത്തില്‍ 319 റണ്‍സെടുത്ത് വിജയിക്കുകയായിരുന്നു. 109 പന്തില്‍ 11 ഫോറും ആറ് സിക്‌സും പറത്തി 137 റണ്‍സെടുത്ത ആരോണ്‍ ഫിഞ്ചിന്റെ ബാറ്റിങാണ് ഓസീസ് വിജയം അനായാസമാക്കിയത്. ട്രാവിസ് ഹെഡ്ഡ് പുറത്താകാതെ 73 പന്തില്‍ 85 റണ്‍സെടുത്തു വിജയത്തില്‍ നിര്‍ണായക സാന്നിധ്യമായി. നേരത്തെ 95 റണ്‍സെടുത്ത മാത്യൂസ്, 70 റണ്‍സെടുത്ത ഗുണരത്‌നെ എന്നിവരുടെ ബാറ്റിങാണ് ലങ്കയ്ക്ക് മികച്ച സ്‌കോര്‍ സമ്മാനിച്ചത്.