തിരുവനന്തപുരം: അളവുതൂക്കത്തില്‍ കൃത്രിമം കാണിക്കുന്ന വ്യാപാരികള്‍ക്കെതിരേ പരാതി നല്‍കുന്നതിനും ഉടന്‍ നടപടിയെടുക്കുന്നതിനും ലീഗല്‍ മെട്രോളജി വകുപ്പ് കോള്‍സെന്റര്‍ ആരംഭിച്ചു.
മന്ത്രി പി. തിലോത്തമന്‍ ഉദ്ഘാടനം നിര്‍വഹിച്ചു. സംസ്ഥാന ഐ.ടി മിഷന്റെ കോള്‍സെന്ററാണ് ഇതിനായി പ്രയോജനപ്പെടുത്തുന്നത്. ജി.പി.എസ് സംവിധാനം ഘടിപ്പിച്ചിട്ടുള്ള വകുപ്പിലെ എന്‍ഫോഴ്‌സ്‌മെന്റ് വാഹനങ്ങളെ പ്രത്യേക സോഫ്റ്റ്‌വെയറുമായി ബന്ധിപ്പിച്ചാണ് കോള്‍സെന്ററിന്റെ പ്രവര്‍ത്തനം.
സെന്ററില്‍ ലഭിക്കുന്ന പരാതികളിലെ വിവരങ്ങള്‍ കോള്‍സെന്റര്‍ എക്‌സിക്യൂട്ടിവ് സോഫ്റ്റ്‌വെയറില്‍ രേഖപ്പെടുത്തുകയും പരാതിക്കിടയാക്കിയ വ്യാപാര സ്ഥാപനം സ്ഥിതി ചെയ്യുന്ന സ്ഥലത്തിന് ഏറ്റവും അടുത്തുള്ള എന്‍ഫോഴ്‌സ്‌മെന്റ് വാഹനത്തിലേക്ക് കൈമാറുകയും ചെയ്യും. പരാതിക്കാരന്റെയും എന്‍ഫോഴ്‌സ്‌മെന്റ് ഉദ്യോഗസ്ഥന്റെയും മൊബൈലിലേക്ക് അപ്പോള്‍ത്തന്നെ പരാതി രജിസ്റ്റര്‍ ചെയ്തതായി അറിയിച്ചുകൊണ്ടുള്ള എസ്.എം.എസ് സന്ദേശവും രജിസ്റ്റര്‍ നമ്പരും ലഭിക്കും. പരാതികള്‍ നല്‍കുന്നതിനു പുറമേ വകുപ്പ് നല്‍കുന്ന സേവനങ്ങളെക്കുറിച്ച് അറിയുന്നതിനും കോള്‍സെന്റര്‍ സേവനം പ്രയോജനപ്പെടുത്താം. നമ്പറുകള്‍: ലാന്‍ഡ്‌ലൈന്‍: 155300, 0471 2115054, 2115098, 2335523 മൊബൈല്‍: 9400198198.