റിയാദ്: സഊദിയിൽ മുവ്വായിരത്തോളം വ്യാജ സർട്ടിഫിക്കറ്റുകൾ പിടികൂടിയതായി എഞ്ചിനീയറിങ് കൗൺസിൽ അറിയിച്ചു. തൊഴിൽ മേഖലയിൽ എഞ്ചിനീയറിങ് കൗൺസിലിൽ രജിസ്ട്രേഷൻ നിർബന്ധമാക്കിയ പ്രൊഫഷനുകളിൽ രജിസ്ട്രേഷനായി സമർപ്പിച്ച സർട്ടിഫിക്കറ്റുകളിൽ നടത്തിയ പരിശോധനയിലാണ് വ്യാജന്മാരെ പിടികൂടിയത്. ഇത്തരത്തിൽ സമർപ്പിക്കപ്പെട്ട 2,799 വ്യാജ എഞ്ചിനീയറിങ്, ടെക്നിക്കൽ  സർട്ടിഫിക്കറ്റുകൾ പിടികൂടിയതായി സഊദി എഞ്ചിനീയറിങ് കൗൺസിൽ അറിയിച്ചു. പിടികൂടപ്പെട്ടവരിൽ വിവിധ രാജ്യക്കാരായ തൊഴിലാളികളുണ്ട്.

      എഞ്ചിനീയറിംഗ്, സാങ്കേതിക ജോലികളിൽ നിയമലംഘകരെയും നുഴഞ്ഞുകയറ്റക്കാരെയും നിയന്ത്രിക്കാൻ അതോറിറ്റി വർഷങ്ങളായി പ്രവർത്തിച്ചു വരികയാണെന്നും എഞ്ചിനീയറിംഗ്, സാങ്കേതിക ജോലികളിൽ ഉയർന്ന നിലവാരം പുലർത്തുന്ന യോഗ്യതകളില്ലാതെ തൊഴിൽ ചെയ്യുന്നവരെ കണ്ടെത്താനുള്ള പദ്ധതിയുടെ ഭാഗമായി അതോറിറ്റി നടത്തിയ പരിശോധനകളിലാണ് വ്യാജ രേഖകൾ കണ്ടെത്തുന്നതെന്നും അതോറിറ്റി സെക്രട്ടറി ജനറൽ എഞ്ചിനീയർ ഫർഹാൻ അൽ ശമ്മരി പറഞ്ഞു.

     നിലവാരമില്ലാത്ത ടെക്‌നിഷ്യൻ മാരെയും അസിസ്റ്റന്റ് എഞ്ചനീയർമാരെയും ഒഴിവാക്കുന്നതിൽ എഞ്ചിനീയറിങ് കൗൺസിൽ നിർണ്ണായക പങ്കു വഹിക്കുന്നുണ്ട്. ഇത്തരക്കാരുടെ സാന്നിധ്യം എഞ്ചിനീയറിംഗ്, നിർമ്മാണ മേഖലയുടെ ഗുണനിലവാരത്തെയും ഉൽ‌പാദനത്തെയും ബാധിക്കുമെന്നും അവർ പ്രവർത്തിക്കുന്ന പ്രോജക്റ്റുകളുടെ സുരക്ഷക്ക് തന്നെ ഭീഷണിയാണെന്നും അദ്ദേഹം കൂട്ടിച്ചേർത്തു. വിദേശ തൊഴിലാളികൾക്കായി പ്രൊഫഷണൽ പരീക്ഷകൾ നടത്താൻ  മുനിസിപ്പൽ, ഗ്രാമകാര്യ മന്ത്രി സഊദി എഞ്ചിനീയറിങ് കൗൺസിലിന് നിർദേശം നൽകിയതായും അദ്ദേഹം വെളിപ്പെടുത്തി.

    എഞ്ചിനീയറിങ്ങിനു പുറമെ നിരവധി ടെക്നിക്കൽ പ്രൊഫഷനുകളാണ് അടുത്തിടെ എഞ്ചിനീയറിങ് കൗൺസിലുമായി ലിങ്ക് ചെയ്തത്. ഇഖാമയിൽ ഇത്തരത്തിലുള്ള ഏതെങ്കിലും പ്രൊഫഷൻ ആണെങ്കിൽ ഇവർ എഞ്ചിനീയറിങ് കൗൺസിലിൽ അംഗത്വം നേടിയാൽ മാത്രമേ ഇഖാമ പുതുക്കാൻ പറ്റൂ. അല്ലെങ്കിൽ ഇഖാമ പുതുക്കുവാനും പ്രൊഫഷൻ മാറ്റുവാനുമായി മൂന്ന് മാസത്തെ താൽകാലിക മെമ്പർഷിപ്പ് മാത്രമാണ് നൽകുന്നത്. ഈ സമയ പരിധിക്കുള്ളിൽ ഇവർ സ്പോൺസറുമായി ബന്ധപ്പെട്ട് അനുയോജ്യമായ പ്രൊഫഷൻ തിരഞ്ഞെടുക്കണം. ഇതിന് കമ്പനിയോ സ്പോൺസറോ സഹകരിക്കണം. അല്ലാത്ത പക്ഷം തൊഴിൽ നഷ്ടപ്പെടുന്ന നിലയിലാണ് കാര്യങ്ങൾ.