പഴയങ്ങാടി: ജൈവവൈവിധ്യ കലവറയായ മാടായിപ്പാറയില്‍ കഴിഞ്ഞ ദിവസം ലോഡ് കണക്കിന് കെട്ടിടാവശിഷ്ടം തള്ളി. സ്വകാര്യ വ്യക്തി ടിപ്പര്‍ ലോറികളില്‍ കൊണ്ടുവന്നാണ് കോണ്‍ക്രീറ്റ് കഷണങ്ങള്‍, ടെയില്‍, കല്ല് എന്നിവ വടുകുന്ദ ശിവക്ഷേത്രത്തിന് സമീപം തളളിയത്. സംഭവത്തെ തുടര്‍ന്ന് ചിറക്കല്‍ കോവിലകം ദേവസ്വം അധികൃതര്‍ പൊലിസില്‍ പരാതി നല്‍കി. അന്വേഷണത്തില്‍ ലോറി ഉടമ വെങ്ങരയിലെ വടക്കന്‍ സുരേന്ദ്രന്റെ നിയന്ത്രണത്തിലാണ് മാലിന്യം തള്ളിയതെന്ന് കണ്ടെത്തുകയായിരുന്നു. പൊലിസ് ഉത്തരവിട്ടതിനെ തുടര്‍ന്ന് മാലിന്യം ഇവിടെ നിന്നു ഉടമ തന്നെ നീക്കം ചെയ്യുകയായിരുന്നു. ചില സ്വകാര്യ വ്യക്തികളുടെ താല്‍പര്യാര്‍ഥമാണ് ഇവിടെ മാലിന്യം തള്ളിയതെന്ന് ലോറി ഉടമ പൊലിസിനോട് പറഞ്ഞു.