പ്രഭാത സമയത്തെ മനുഷ്യന്റെ പാപ പ്രവര്‍ത്തനങ്ങള്‍ക്ക് മോചനം നല്‍കാന്‍ പ്രദോഷ സമയത്തും പ്രദോഷ സമയത്തെ പാപങ്ങള്‍ പൊറുത്തു കൊടുക്കാന്‍ പ്രഭാത സമയത്തും കാരുണ്യവാനായ സൃഷ്ട്ടാവ് ഒരുങ്ങിയിറങ്ങുന്ന വിശുദ്ധ മാസമാണ് റമദാന്‍. പുതിയ കാലത്തെ ചിന്തകളും പ്രവര്‍ത്തനങ്ങളും മലീമസപ്പെടുത്തിയ ഹൃദയത്തിലും കര്‍മത്തിലും ആത്മീയതയുടെ നിറവ് നല്‍കി ശുദ്ധീകരണത്തിന് ഇടം നല്‍കുകയാണ് റമദാന്‍.

പാപപങ്കിലമായ പ്രവര്‍ത്തനങ്ങളില്‍ നിന്നും സ്ഫടിക സമാനമായ ഹൃദയത്തെ വിമുലീകരിച് ജീര്‍ണതകളെ തുടച്ചു നീക്കേണ്ട ശുദ്ധികലാശത്തിന്റെ കാലം. ഗതകാലങ്ങളിലെ പാപക്കറകളെ കഴുകിക്കളയാന്‍ ഇതിലേറെ സുവര്‍ണാവസരം ഇനിയില്ല. സൃഷ്ടികളോട് ഏറെ കാരുണ്യവാനായ അള്ളാഹു കാത്തിരിക്കുകയാണ്. പാപികളായ അടിമകളുടെ ചോദ്യങ്ങള്‍ക്ക് ഉത്തരം കൊടുക്കാന്‍. അതിനാല്‍, പാശ്ചാത്താപങ്ങള്‍ കൊണ്ട് നമ്മുടെ കണ്‍തടങ്ങള്‍ നിറയട്ടെ... കണ്ണുനീര്‍ തുള്ളികള്‍ കൊണ്ട് നമ്മുടെ മുസല്ലകള്‍ക്ക് നനവ് പരക്കട്ടെ...

'ഒരടിമ തന്റെ സ്രഷ്ട്ടാവിനെ ഓര്‍ത്ത് ഒരു തുള്ളി കണ്ണുനീര്‍ പൊഴിച്ചാല്‍ അവന് നരകം നിഷിദ്ധമാണെന്ന ഇസ്‌ലാമിക അധ്യാപനം ഇവിടെ ഏറെ പ്രസക്തമാവുകയാണ്. കാരുണ്യവും പാപമോചനവും നരക മോചനവും തുടങ്ങി ഒട്ടേറെ നന്മകള്‍ നിറഞ്ഞ് നില്‍ക്കുന്ന ഈ വസന്ത കാലത്തെ ഉപയോഗപെടുത്താന്‍ വിശ്വാസികളായ നാം ഇനിയും മടിച്ചു നില്‍ക്കരുത്. സ്രഷ്ടാവ് ചെയ്ത് തന്ന അനുഗ്രഹങ്ങള്‍ക്ക് നന്ദി ചെയ്യുകയും സഹജീവികളോട് ദയാവായ്പ് കാണിക്കുക എന്നത് റമദാനില്‍ പ്രത്യേകിച്ച് ഏറെ പുണ്യകരമാണ്. മത,ജാതി ചിന്തകള്‍ക്കതീതമായി സ്‌നേഹം പടര്‍ത്തുന്ന കാരുണ്യ പ്രവര്‍ത്തനങ്ങള്‍ക്ക് ഊര്‍ജം നല്‍കാന്‍ നാം രംഗത്തിറങ്ങുക.

'ഭൂമിയിലുള്ളവരോട് നിങ്ങള്‍ കരുണ കാണിക്കുക ആകാശത്തിലുള്ളവന്‍ നിങ്ങളോട് കരുണ കാണിക്കും'. അങ്ങനെ വ്യക്തിയുടെ സ്വകാര്യ തലങ്ങളെ ശുദ്ധീകരിക്കുന്നതന്നോടൊപ്പം ആ വ്യക്തി ഉള്‍കൊള്ളുന്ന ചുറ്റുപാടുകളുടെ സംസ്‌കരണത്തിനും ഉദാനത്തിനും ഉതകുന്ന രീതിയില്‍ പ്രവര്‍ത്തങ്ങള്‍ ചിട്ടപ്പെടുത്താന്‍ വിശ്വാസി ഏറെ ബാധ്യസ്ഥനാണ്.
സ്രഷ്ട്ടാവിനോട് നന്മ ചെയ്യുന്നവനെ സൃഷ്ടികളോടും നന്മയില്‍ വര്‍ത്തിക്കാന്‍ കഴിയൂ എന്ന തത്വത്തില്‍ നിന്ന് അതിര്‍ വരമ്പുകള്‍ ലംഘിക്കാതെ ആത്മീയതയെ ഊര്‍ജമാക്കി മാറ്റാന്‍ ഈ സമയം നാം ഉപയോഗപ്പെടുത്തുക.

എങ്കില്‍ കളങ്കവും കലര്‍പ്പുമില്ലാത്ത ജീവിതത്തെ മുന്നോട്ട് നയിക്കാന്‍ ഉതകുന്ന ഇന്ധനമായിത്തീരും ഈ ആത്മീയത. അതിലുപരി ഈ മാസത്തിലൂടെ നാം ആര്‍ജിച്ചെടുക്കുന്ന ആത്മീയ ശക്തിയും ഭക്തിയും നുകരാനും പകരാനും കഴിഞ്ഞാല്‍ നാം ഏറെ ധന്യരാകും. അള്ളാഹു നമ്മുടെ കര്‍മങ്ങളെല്ലാം സ്വീകരിക്കുമാറാകട്ടെ...ആമീന്‍