കുമ്പള: റവന്യൂ ഉദ്യോഗസ്ഥരെ അക്രമിച്ച മണല്‍ മാഫിയ സംഘത്തിലെ ഒരാളെ കുമ്പള പൊലിസ് അറസ്റ്റ് ചെയ്തു. ആരിക്കാടി കടവത്ത്  ലത്തീഫാ(23)ണ്  അറസ്റ്റിലായത്.  കഴിഞ്ഞ ചൊവ്വാഴ്ച വൈകിട്ട് മണല്‍ മാഫിയ സംഘം ബംബ്രാണ വില്ലേജ് ഉദ്യോഗസ്ഥരായ വിനോദ് , മുഹമ്മദ് എന്നിവരെ ആക്രമിച്ചുവെന്നാണു പരാതി. കുമ്പള പാലത്തിനടുത്തു പുഴയോരത്ത് അനധികൃതമായി കടത്തുവാന്‍ ചാക്കിലാക്കി മണല്‍ സൂക്ഷിച്ചിട്ടുണ്ടെന്ന രഹസ്യ വിവരം ലഭിച്ചതിനെത്തുടര്‍ന്നു കണ്ടെത്തി പിടിച്ചെടുക്കുവാനാണ് റവന്യൂ ഉദ്യോഗസ്ഥര്‍ എത്തിയത്. ഇരുപതോളം വരുന്ന സംഘമാണ് ആക്രമിച്ചതെന്നാണ് ഉദ്യോഗസ്ഥര്‍ നല്‍കിയ പരാതിയില്‍ പറയുന്നത്. എന്നാല്‍ മൂന്നു പേരാണ് സംഘത്തിലുണ്ടായിരുന്നതെന്ന് പൊലിസ് പറഞ്ഞു. കേസിലെ മൂന്നാം പ്രതിയാണ് അറസ്റ്റിലായ ലത്തീഫ്. ലത്തീഫിനെ രണ്ടാഴ്ചത്തേക്ക് റിമാന്റു ചെയ്തു.