മസ്‌കത്ത്: ഒമാനില്‍ കൊവിഡ് വാക്‌സിനേഷന്‍ തുടങ്ങി. ഒമാന്‍ ആരോഗ്യമന്ത്രി ഡോ. അഹമ്മദ് അല്‍ സഈദി ഫൈസര്‍ വാക്‌സിന്‍ന്റെ ആദ്യ ഡോസ് സ്വീകരിച്ചു. ആദ്യഘട്ടത്തില്‍ 15,600 പേര്‍ക്കാണ് വാക്‌സിന്‍ നല്‍കുന്നത്.

വാക്‌സിനേഷനുള്ള എല്ലാ ഒരുക്കങ്ങളും പൂര്‍ത്തിയായതായി ആരോഗ്യ വകുപ്പ് അറിയിച്ചു. മസ്‌കത്ത് ഗവര്‍ണറേറ്റില്‍ മൂന്നിടങ്ങളിലാണ് വാക്‌സിനേഷന്‍ കേന്ദ്രങ്ങളായി പ്രവൃത്തിക്കുക.

രണ്ടാം ഘട്ടമായുള്ള 28000 ഡോസ് ജനുവരിയിലും എത്തും. വിവിധ ഘട്ടങ്ങളിലായി ജനസംഖ്യയുടെ 60 ശതമാനം പേര്‍ക്ക് വാക്‌സിന്‍ നല്‍കാനാണ് ഒമാന്‍ ലക്ഷ്യമിടുന്നത്. നഴ്‌സുമാര്‍ക്കായി കഴിഞ്ഞ ദിവസങ്ങളിലായി വാക്‌സിനേഷന്‍ പരിശീലനം നല്‍കിയിരുന്നു. ഒമാനില്‍ ഇതുവരെ 128,000 പേര്‍ക്ക് കൊവിഡ് ബാധിച്ചതായാണ് കണക്ക്. 1,400 പേര്‍ മരിക്കുകയും ചെയ്തു.