കണ്ണൂര്‍: സംസ്ഥാനത്ത് യു.ഡി.എഫിനു ഭരണത്തിലേറാന്‍ ഭൂരിപക്ഷം ലഭിച്ച ഏക കോര്‍പറേഷനായ കണ്ണൂരില്‍ കോണ്‍ഗ്രസ് മേയര്‍ സ്ഥാനാര്‍ഥിയെ തെരഞ്ഞെടുത്തത് വോട്ടെടുപ്പിലൂടെ. കോര്‍പറേഷന്‍ മുന്‍ സ്റ്റാന്‍ഡിങ് കമ്മിറ്റി ചെയര്‍മാന്‍ ടി.ഒ മോഹനനെ കൗണ്‍സിലര്‍മാരുടെ യോഗത്തില്‍ മേയര്‍ സ്ഥാനാര്‍ഥിയായി തെരഞ്ഞെടുത്തു.
ഇന്നലെ കോണ്‍ഗ്രസ് കൗണ്‍സിലര്‍മാരെ വിളിച്ചുവരുത്തിയാണ് നേതൃത്വം വോട്ടെടുപ്പ് നടത്തിയത്. 20 അംഗങ്ങളില്‍ 11പേര്‍ ഡി.സി.സി സെക്രട്ടറിയായ ടി.ഒ മോഹനനും ഒന്‍പത് പേര്‍ മുന്‍ ഡെപ്യൂട്ടി മേയര്‍ പി.കെ രാഗേഷിനെയും പിന്തുണച്ചു.
കെ.പി.സി.സി വൈസ് പ്രസിഡന്റ് ടി. സിദ്ദീഖിന്റെ നേതൃത്വത്തിലായിരുന്നു വോട്ടെടുപ്പ്. ടി.ഒ മോഹനനു പുറമേ കെ.പി.സി.സി ജനറല്‍ സെക്രട്ടറി മാര്‍ട്ടിന്‍ ജോര്‍ജ്, മുന്‍ ഡെപ്യൂട്ടി മേയര്‍ പി.കെ രാഗേഷ് എന്നിവരായിരുന്നു മേയര്‍ സ്ഥാനത്തേക്ക് പരിഗണിക്കപ്പെട്ടത്.
ദിവസങ്ങള്‍ നീണ്ട ചര്‍ച്ചകള്‍ സമവായത്തിലെത്താതിരുന്നതോടെയാണ് വോട്ടെടുപ്പിലേക്ക് നീങ്ങിയത്. എന്നാല്‍ വോട്ടെടുപ്പ് നടന്നില്ലെന്നും സമവായത്തിലൂടെയാണ് മേയറെ കണ്ടെത്തിയതെന്നും കെ.പി.സി.സി വര്‍ക്കിങ് പ്രസിഡന്റ് കെ. സുധാകരന്‍ എം.പി പ്രതികരിച്ചു.