മാഡ്രിഡ്: ഡിപോര്‍ടീവോ അലാവെസിനെതിരായ പോരാട്ടത്തില്‍ ഗോള്‍ നേടി സൂപ്പര്‍ താരങ്ങളായ ലയണല്‍ മെസ്സിയും നെയ്മറും റെക്കോര്‍ഡ് ബുക്കില്‍ സ്ഥാനം പിടിച്ചു.
കിങ്‌സ് കപ്പിന്റെ നാല് വ്യത്യസ്ത ഫൈനല്‍ പോരാട്ടങ്ങളില്‍ ഗോള്‍ നേടുന്ന താരമായി മെസ്സി മാറി. 1950ല്‍ അത്‌ലറ്റിക്ക് ബില്‍ബാവോയുടെ ടെല്‍മോ സറ സ്വന്തമാക്കിയ റെക്കോര്‍ഡാണ് അര്‍ജന്റൈന്‍ താരം തിരുത്തിയത്. കിങ്‌സ് കപ്പിന്റെ നാല് ഫൈനലുകളില്‍ അഞ്ച് ഗോളുകളാണ് താരം വലയിലാക്കിയത്. 2009, 2012, 2015 വര്‍ഷങ്ങളില്‍ അത്‌ലറ്റിക്ക് ബില്‍ബാവോയ്‌ക്കെതിരേ ഗോള്‍ നേടിയ മെസ്സി ഇത്തവണ അലാവെസിനെതിരേയും വല ചലിപ്പിച്ചാണ് നേട്ടത്തിലെത്തിയത്.
റയല്‍ മാഡ്രിഡ് ഇതിഹാസമായിരുന്ന ഫെറങ്ക് ഫുഷ്‌കാസിന് ശേഷം തുടര്‍ച്ചയായി മൂന്ന് കിങ്‌സ് കപ്പ് ഫൈനല്‍ പോരാട്ടങ്ങളില്‍ ഗോള്‍ നേടുന്ന താരമായി നെയ്മര്‍ മാറി. 1960ലാണ് പുഷ്‌കാസ് നേട്ടം സ്വന്തമാക്കിയത്. 57 വര്‍ഷങ്ങള്‍ക്ക് ശേഷമാണ് ബ്രസീലിയന്‍ താരം അത്തരമൊരു നേട്ടത്തിലെത്തുന്നത്.
അലാവെസിനെതിരേ രണ്ടാം ഗോള്‍ നേടിയ നെയ്മര്‍ 2015 അത്‌ലറ്റിക്ക് ബില്‍ബാവോയെ 3-1ന് ബാഴ്‌സ കീഴടക്കിയപ്പോഴും കഴിഞ്ഞ തവണ സെവിയ്യയെ 2-0ത്തിന് പരാജയപ്പെടുത്തിയപ്പോഴും സ്‌കോര്‍ ചെയ്തു.