ബദിയഡുക്ക(കാസര്‍കോട്): പനി ബാധിച്ച് സഹോദരങ്ങളായ രണ്ടു പിഞ്ചു കുട്ടികള്‍ മരിച്ചു. ബദിയഡുക്ക കന്യപ്പാടിയിലെ സിദ്ദീഖ് - അസറുന്നിസ ദമ്പതികളുടെ മക്കളായ സിദ്‌റത്തുല്‍ മുന്‍തഹ (എട്ടുമാസം), മൊയ്തീന്‍ ഷിനാസ് (4) എന്നിവരാണ് മരിച്ചത്. മാതാവ് അസറുന്നിസ പനിബാധിച്ച് മംഗളൂരുവിലെ ആശുപത്രിയില്‍ ചികിത്സയില്‍ കഴിയുകയാണ്. ഇവര്‍ ഡോക്ടര്‍മാരുടെ നിരീക്ഷണത്തിലാണ്. സിദ്‌റത്തുല്‍ മുന്‍തഹ കഴിഞ്ഞ ദിവസം വൈകുന്നേരവും മൊയ്തീന്‍ ഷിനാസ് ഇന്നലെ രാവിലെയുമാണ് മരിച്ചത്.
പനി ബാധിച്ച കുട്ടികളെ ആദ്യം ചെങ്കളയിലെ ഇ.കെ നായനാര്‍ മെമ്മോറിയല്‍ ആശുപത്രിയില്‍ പ്രവേശിപ്പിച്ചിരുന്നു. തുടര്‍ന്ന് അസുഖം ഭേദമാകാതെ വന്നതോടെ മംഗളൂരുവിലെ ആശുപത്രിയിലേക്ക് മാറ്റുകയായിരുന്നു. അതേ സമയം മൂവര്‍ക്കും ഏതു തരം പനിയാണ് ബാധിച്ചതെന്നു കണ്ടെത്താന്‍ രക്ത സാംപിളുകള്‍ പുനയിലെ ലാബിലേക്ക് ആരോഗ്യ വകുപ്പ് അധികൃതര്‍ അയച്ചിട്ടുണ്ട്. കുട്ടികളുടെ പിതാവ് സിദ്ധിഖിന്റെ രക്ത സാംപിളും പരിശോധനക്ക് അയച്ചിട്ടുണ്ട്.
കുരുന്നുകള്‍ മരിച്ച സംഭവത്തെത്തുടര്‍ന്ന് ഉന്നത മെഡിക്കല്‍ സംഘം കന്യാപാടിയിലെത്തി.എച്ച്1 എന്‍1 അല്ലെന്ന് പരിശോധനയില്‍ വ്യക്തമായതായി ജില്ലാ മെഡിക്കല്‍ ഓഫിസര്‍ ഡോ.എ.പി ദിനേശ് കുമാര്‍ പറഞ്ഞു.