ഇന്ത്യയിലെ മികച്ച വിനോദസഞ്ചാര കേന്ദ്രങ്ങളില്‍ ഒന്നാണ് കേരളം. വൈവിധ്യങ്ങള്‍ കൊണ്ട് ആകര്‍ഷണീയമായ കാഴ്ചാനുഭവങ്ങള്‍ സമ്മാനിക്കുന്ന കേരളം, വിനോദസഞ്ചാരികളെ എന്നും വരവേല്‍ക്കുന്നു. പ്രകൃതിരമണീയത കൊണ്ട് ലോകത്തു സന്ദര്‍ശിക്കേണ്ട 50 സ്ഥലങ്ങളില്‍ ഒന്നായി നാച്ചുറല്‍ ജിയോഗ്രഫിക് മാഗസിന്‍ കേരളത്തെ തിരഞ്ഞെടുക്കുകയുണ്ടായി. കേരളത്തിലെ മിക്ക വിനോദ സഞ്ചാരകേന്ദ്രങ്ങളുമിന്ന് നവീനമായ സൗകര്യങ്ങള്‍ ഏര്‍പ്പെടുത്തിയത് കാണാനാകും. അത്തരം നവീന സാധ്യതകള്‍ ഉപയോഗപ്പെടുത്തി അടുത്തകാലത്ത് വിനോദസഞ്ചാര ഭൂപടത്തില്‍ ശ്രദ്ധയാകര്‍ഷിച്ച ഒരു സ്ഥലമാണ് വയനാട്ടിലെ കര്‍ലാട് തടാകം.

200 വര്‍ഷത്തിന്റെ ചരിത്രം പറയാനുണ്ട് ഈ തടാകത്തിന്. ഇപ്പോള്‍ തടാകം സ്ഥിതിചെയ്യുന്ന സ്ഥലം നെല്‍കൃഷി ചെയ്തിരുന്ന ഒരു വയലായിരുന്നു. 200 വര്‍ഷങ്ങള്‍ക്കു മുന്‍പുണ്ടായ ഉരുള്‍പൊട്ടലില്‍ ഈ വയലിലേക്ക് സമീപത്തെ കുന്ന് ഇടിഞ്ഞുവീണ് രൂപപ്പെട്ടതാണ് ഈ തടാകം. വയലിലുണ്ടായിരുന്ന രണ്ടു മനുഷ്യരെയും നാലു കാളകളെയും ആ കുന്നിടിച്ചിലില്‍ കാണാതായത്രെ. ഉരുള്‍പൊട്ടലില്‍ ഇടിഞ്ഞുവീണ മരത്തുരുത്തും പുല്‍ത്തുരുത്തും ഇന്നും തടാകത്തില്‍ കൗതുകമായി നിലനില്‍ക്കുന്നു. എട്ട് ഏക്കറില്‍ സ്ഥിതി ചെയ്യുന്ന തടാകത്തിന് 42 അടി ആഴമുണ്ട്. മുന്‍പ് ഇരുന്നൂറോളം കുടുംബങ്ങള്‍ ഈ തടാകത്തില്‍ കുളിച്ചിരുന്നു. പിന്നീട്, തടാകത്തില്‍ നിറയെ മത്സ്യങ്ങള്‍ ഉള്ളതിനാല്‍ ആദിവാസികള്‍ക്ക് ഉപജീവനം എന്ന നിലയില്‍ മത്സ്യം പിടിക്കാന്‍ വിട്ടുകൊടുത്തു. 2010 ഓഗസ്റ്റ് 15നാണ് ടൂറിസം വകുപ്പ് തടാകം ഏറ്റെടുക്കുന്നതും വിനോദസഞ്ചാരകേന്ദ്രമായി പൊതുജനങ്ങള്‍ക്കു തുറന്നുകൊടുക്കുന്നതും.
വിദേശികളെ ആകര്‍ഷിക്കുന്ന രീതിയില്‍ ഹിപ്പ്‌ലൈന്‍, കയാക്കിങ്, റോപ്പ്‌ക്ലൈബിങ് എന്നീ സാഹസിക വിനോദങ്ങള്‍ തുടങ്ങിയത് 2016 മാര്‍ച്ചിലാണ്. മാത്രമല്ല, ബോര്‍ഡിങ് ബോള്‍, ഹയര്‍ഗണ്‍ഗെയിം, ആര്‍ച്ചറി, മഞ്ഞുറ-കര്‍ലാട് റോഡ്, കുട്ടികളുടെ പാര്‍ക്ക് തുടങ്ങിയവയെല്ലാം വരാന്‍ പോകുന്ന പദ്ധതികളാണ്. ഇവയ്ക്കു പുറമെ, തൂക്കുപാലം, നീന്തല്‍കുളം, ടെന്റുകള്‍, കാന്റീന്‍ എന്നിവയും വരുന്നു. ചെമ്പല്ലി, കട്‌ല, ഫിലോപ്പിയ, സൈപ്രസ്, രോഹു തുടങ്ങിയ ഇനത്തില്‍പെട്ട ധാരാളം മത്സ്യങ്ങള്‍ തടാകത്തിലുണ്ട്.

കര്‍ലാട് തടാകം വികസനത്തിന്റെ പാതയിലാണെങ്കിലും അവിടേക്കുള്ള ബസ് സേവനം വിരളമാണ്. കുളിക്കാനുള്ള സ്ഥലം മാത്രമായിരുന്ന കര്‍ലാട് തടാകം ദിവസവും ഒരു ലക്ഷത്തിനു മുകളില്‍ വരുമാനമുള്ള വിനോദ സഞ്ചാരകേന്ദ്രമായി വളര്‍ന്നിരിക്കുന്നു. ശുദ്ധമായ വായുവും ശാന്തമായ അന്തരീക്ഷവും ഈ തടാകപരിസരത്തെ കൂടുതല്‍ ആകര്‍ഷണീയമാക്കുന്നു.്‌