ദമാം: വിവിധ ഗൾഫ് രാജ്യങ്ങളിലേക്ക് ആദ്യമായി ജോലിക്ക് പോകുന്ന ഇന്ത്യൻ പ്രവാസികൾക്ക് നൽകേണ്ട മിനിമം റഫറൽ ശമ്പളം വെട്ടിക്കുറച്ച കേന്ദ്ര വിദേശകാര്യ മന്ത്രാലയത്തിന്റെ നടപടി അടിയന്തരമായി പിൻവലിക്കണമെന്ന് നവയുഗം സാംസ്ക്കാരികവേദി കേന്ദ്രകമ്മിറ്റി പ്രമേയത്തിലൂടെ ആവശ്യപ്പെട്ടു. സെപ്‌തംബറിൽ ഇറക്കിയ ഇന്ത്യൻ വിദേശകാര്യ മന്ത്രാലയ സർക്കുലർ പ്രകാരം, ഖത്തർ, ബഹറിൻ, ഒമാൻ, യു.എ.ഇ എന്നീ രാജ്യങ്ങളിൽ 200 ഡോളറും, കുവൈറ്റിൽ 245 ഡോളറും, സഊദിയിൽ 324 ഡോളറുമായാണ് മിനിമം റഫറൽ ശമ്പളം നിശ്ചയിച്ചിട്ടുള്ളത്.

     മുൻപുണ്ടായിരുന്ന മിനിമം റഫറൽ ശമ്പളത്തേക്കാൾ കുറവാണു ഇത്. കൊവിഡ് രോഗബാധയുടെ മറവിൽ വിദേശ തൊഴിൽ ദാതാക്കളുടെ സമ്മർദ്ദത്തെത്തുടർന്നാണ് കേന്ദ്രസർക്കാർ ഈ നടപടി സ്വീകരിച്ചിരിക്കുന്നതെന്നും കടുത്ത പ്രവാസിദ്രോഹ നടപടിയാണ് ഇതെന്ന് നവയുഗം കേന്ദ്രകമ്മിറ്റി ആരോപിച്ചു.

     കൊവിഡ് കാരണം ലക്ഷക്കണക്കിന് പ്രവാസികൾ സാമ്പത്തികമായി പ്രതിസന്ധികൾ നേരിടുന്ന ഈ കാലഘട്ടത്തിൽ തന്നെ ഇത്തരത്തിൽ ഒരു നടപടിക്ക് കേന്ദ്രസർക്കാർ തയ്യാറായത് ഏറെ പ്രതിഷേധാർഹമാണ്. അടിയന്തരമായി വെട്ടിക്കുറച്ച മിനിമം റഫറൽ ശമ്പളം  പുനഃസ്ഥാപിക്കണമെന്ന് നവയുഗം കേന്ദ്രകമ്മിറ്റി കേന്ദ്രസർക്കാരിനോട് ആവശ്യപ്പെട്ടു.