ടി.മുഹമ്മദ്

തിരുവനന്തപുരം: വിവിധ ജില്ലകളില്‍ റെഡ്, ഓറഞ്ച് അലര്‍ട്ടുകള്‍ നല്‍കി കാലവര്‍ഷം തകര്‍ത്തുപെയ്തിട്ടും സംസ്ഥാനത്ത് 26 ശതമാനം മഴക്കുറവ്. ജൂണ്‍ ഒന്നു മുതല്‍ ഇന്നലെ വരെ സംസ്ഥാനത്ത് ലഭിച്ച മഴയുടെ തോത് വിലയിരുത്തുമ്പോഴുള്ള കണക്കാണിത്.
സാധാരണ ഗതിയില്‍ ഈ കാലയളവില്‍ 1206.3 മില്ലി മീറ്റര്‍ മഴ ലഭിക്കേണ്ടിടത്ത് 890.1 മില്ലി മീറ്റര്‍ മഴ മാത്രമാണ് കേരളത്തില്‍ ലഭിച്ചതെന്ന് കാലാവസ്ഥാ നിരീക്ഷണ കേന്ദ്രത്തിന്റെ കണക്കുകള്‍ വ്യക്തമാക്കുന്നു. ജില്ലകള്‍ തിരിച്ചുള്ള കണക്കെടുത്താല്‍ ഒന്‍പതിടത്ത് മഴക്കുറവ് രേഖപ്പെടുത്തിയിട്ടുണ്ട്.
ഏറ്റവും കൂടുതല്‍ മഴക്കുറവ് രേഖപ്പെടുത്തിയത് വയനാട് ജില്ലയിലാണ്. ഇവിടെ 52 ശതമാനവും ഇടുക്കിയില്‍ 42 ശതമാനവും മഴക്കുറവ് രേഖപ്പെടുത്തി. ആലപ്പുഴ (22), എറണാകുളം(25), കൊല്ലം(30), മലപ്പുറം (27), പാലക്കാട് (25), പത്തനംതിട്ട(32), തൃശൂര്‍(33) എന്നിങ്ങനെയാണ് മറ്റു ജില്ലകളിലെ മഴക്കുറവ് .
കണ്ണൂര്‍, കാസര്‍കോട്, കോട്ടയം, കോഴിക്കോട്, തിരുവനന്തപുരം ജില്ലകളില്‍ ആവശ്യത്തിന് മഴ ലഭിച്ചിട്ടുണ്ട്.
കഴിഞ്ഞ വര്‍ഷം ജൂണ്‍ മുതല്‍ സെപ്റ്റംബര്‍ വരെ നീണ്ടുനിന്ന തെക്കുപടിഞ്ഞാറന്‍ കാലവര്‍ഷത്തില്‍ കേരളത്തിന് 23 ശതമാനം അധികം മഴ ലഭിച്ചിരുന്നു. ഈ വര്‍ഷം ഒരാഴ്ച പിന്നിട്ട് ജൂണ്‍ എട്ടിനാണ് കാലവര്‍ഷം തുടങ്ങിയത്.
അതേസമയം കനത്ത മഴയുടെ പശ്ചാത്തലത്തില്‍ കഴിഞ്ഞ ദിവസങ്ങളില്‍ സംസ്ഥാനത്ത് വിവിധ ജില്ലകളില്‍ നല്‍കിയിരുന്ന റെഡ്, ഓറഞ്ച്, യെല്ലോ അലര്‍ട്ടുകള്‍ പിന്‍വലിച്ചിട്ടുണ്ട്.
ഇന്ന് കാസര്‍കോട് ജില്ലയില്‍ മാത്രം യെല്ലോ അലര്‍ട്ട് നല്‍കിയിട്ടുണ്ട്.
ഇനി ഈ മാസം 28 വരെ ഒറ്റപ്പെട്ടയിടങ്ങളിലൊഴിച്ചാല്‍ പൊതുവേ മഴ കുറവായിരിക്കുമെന്നാണ് കാലാവസ്ഥാനിരീക്ഷണ കേന്ദ്രത്തിന്റെ വിലയിരുത്തല്‍. അതിനുശേഷം വീണ്ടും കാലവര്‍ഷം ശക്തിപ്രാപിക്കുമെന്നാണ് പ്രതീക്ഷയെന്ന് കാലാവസ്ഥാനിരീക്ഷണ കേന്ദ്രം അധികൃതര്‍ പറഞ്ഞു.