തിരുവനന്തപുരം: യൂനിവേഴ്‌സിറ്റി കോളജില്‍ വിദ്യാര്‍ഥിയെ കുത്തിക്കൊലപ്പെടുത്താന്‍ ശ്രമിച്ച കേസിലെ ഒന്നും രണ്ടും പ്രതികളായ ആര്‍. ശിവരഞ്ജിത്തിന്റെയും എ.എന്‍ നസീമിന്റെയും ജാമ്യാപേക്ഷ തിരുവനന്തപുരം ജില്ലാ സെഷന്‍സ് കോടതി തള്ളി.
പൊലിസിന്റെ എതിര്‍വാദം അംഗീകരിച്ചാണ് കോടതി അപേക്ഷ തള്ളിയത്. കോളജിലുണ്ടായത് സാധാരണ കാംപസുകളില്‍ നടക്കുന്ന അടിപിടിയായിരുന്നുവെന്നും മനഃപൂര്‍വം ചെയ്ത കുറ്റകൃത്യമല്ലെന്നുമായിരുന്നു പ്രതികളുടെ വാദം. എന്നാല്‍, പ്രതികളെ ജാമ്യത്തില്‍വിട്ടാല്‍ കോളജില്‍ വീണ്ടുമെത്തി അരക്ഷിതാവസ്ഥ സൃഷ്ടിക്കുമെന്ന് പൊലിസ് കോടതിയെ ബോധിപ്പിച്ചു.
കോളജിലെത്തി പരീക്ഷാ ഹാള്‍ടിക്കറ്റ് വാങ്ങാന്‍ അനുവദിക്കണമെന്ന് ആവശ്യപ്പെട്ട് നാലും ആറും പ്രതികളായ ആദില്‍, അദ്വൈത് എന്നിവര്‍ സമര്‍പ്പിച്ച അപേക്ഷയും കോടതി തള്ളി. ഹരജിയുമായി മുന്നോട്ടുപോകണമെങ്കില്‍ പ്രിന്‍സിപ്പാളിന്റെ വിശദീകരണക്കത്ത് ഉള്‍പ്പെടുത്തി വീണ്ടും അപേക്ഷ സമര്‍പ്പിക്കാനും കോടതി നിര്‍ദേശിച്ചു.
അതേസമയം, കേസന്വേഷണം അട്ടിമറിക്കാനുള്ള ശ്രമം അണിയറയില്‍ സജീവമാണ്. കേസില്‍ ഇനി പിടിയിലാകാനുള്ളവര്‍ക്കായി ലുക്കൗട്ട് നോട്ടിസ് ഇറക്കുമെന്ന് പൊലിസ് അറിയിച്ചുവെങ്കിലും നടപടിയുണ്ടായിട്ടില്ല. കേസില്‍ ഡി.ജി.പി പ്രഖ്യാപിച്ച ക്രൈംബ്രാഞ്ച് അന്വേഷണവും ഇതുവരെ തുടങ്ങിയിട്ടില്ല.