കൊട്ടാരക്കര: റേഷന്‍ കടയിലേക്ക് കൊണ്ടു പോകേണ്ട ഭക്ഷ്യ വസ്തുക്കള്‍ റോഡരികില്‍ ഉപേക്ഷിച്ച നിലയില്‍ കണ്ടെത്തി. കൊട്ടാരക്കര ഓയൂര്‍ റോഡില്‍ തൃക്കണ്ണമംഗലിലാണ് കഴിഞ്ഞ ദിവസം റേഷന്‍ കടയിലേക്ക് കൊണ്ടു പേകേണ്ട ഭക്ഷ്യ സാധനങ്ങള്‍ ചാക്കുകളിലാക്കി അടുക്കിയിരിക്കുന്നത് പ്രദേശവാസികളുടെ ശ്രദ്ധയില്‍പ്പെട്ടത്. ടാര്‍പോളിന്‍ കൊണ്ടു മൂടിയ നിലയിലായിരുന്നു ചാക്കുകള്‍. നാട്ടുകാര്‍ വിവരമറിയിച്ചതിനെ തുടര്‍ന്ന് കൊട്ടാരക്കര സപ്ലൈ ഓഫിസര്‍ സ്ഥലത്തെത്തി അന്വേഷണം നടത്തി. തുടര്‍ന്നാണ് കൊട്ടാരക്കര ഡിപ്പോയില്‍ നിന്നും തൃക്കണ്ണമംഗല്‍ ഭാഗത്തെ റേഷന്‍ കടകളിലേക്കു വാതില്‍പ്പടി വിതരണത്തിനു കൊണ്ടുപോയ അരിയും ഗോതമ്പുമാണ് ഇവയെന്ന് മനസ്സിലായത്. മഴ നഞ്ഞു നശിക്കുമായിരുന്ന ഭക്ഷ്യ സാധനങ്ങള്‍ നാട്ടുകാരുടെ ഇടപെടലോടെയാണ് തിരികെ എടുപ്പിച്ചത്. സപ്ലൈ ഓഫിസര്‍ ലോറിക്കാരെ വിളിച്ചു വരുത്തിചാക്കുകള്‍ തിരികെ കയറ്റിക്കുകയായിരുന്നു.