കേരളത്തിലേതെന്നു തെറ്റിദ്ധരിപ്പിക്കുന്ന തരത്തില്‍ ഉത്തര്‍പ്രദേശിലെ കശാപ്പിന്റെ ചിത്രം ഫെയ്‌സ്ബുക്കിലിട്ട് ബി.ജെ.പി നേതാവ് കെ സുരേന്ദ്രന്‍. കേന്ദ്ര സര്‍ക്കാരിന്റെ കന്നുകാലി കശാപ്പ് നിരോധന നിയമത്തിനെതിരെ കേരളത്തില്‍ നടക്കുന്ന പ്രതിഷേധങ്ങളെ വിമര്‍ശിച്ചു കൊണ്ടാണ് ഈ ചിത്രം പോസ്റ്റ് ചെയ്തിരിക്കുന്നത്.

ചിത്രം കേരളത്തിലേതല്ലെന്നറിയിച്ച് നിരവധി പേര്‍ കമന്റുകളും പരിഹാസങ്ങളും ചൊരിയുന്നുണ്ടെങ്കിലും, മറ്റു സംസ്ഥാനങ്ങളിലുള്ളവരടക്കം കേരളത്തില്‍ നടക്കുന്ന കിരാത നടപടിയെന്ന നിലയില്‍ പോസ്റ്റ് ഷെയര്‍ ചെയ്തിട്ടുണ്ട്.

[caption id="attachment_339423" align="alignleft" width="315"] സുരേന്ദ്രന്‍ പോസ്റ്റ് ചെയ്തിരിക്കുന്ന വ്യാജ ചിത്രം[/caption]

കേരളത്തില്‍ നടക്കുന്നതാണെന്ന് കാണിച്ച് ഉത്തരേന്ത്യന്‍ സംസ്ഥാനങ്ങളിലെ സോഷ്യല്‍ മീഡിയകളില്‍ കൊടുക്രൂര ദൃശ്യങ്ങള്‍ മുമ്പും ബി.ജെ.പി നേതാക്കള്‍ പ്രചരിപ്പിച്ചിരുന്നു. ആഫ്രിക്കന്‍ രാജ്യങ്ങളില്‍ മനുഷ്യരെ കൊല്ലുന്ന വീഡിയോ, കേരളത്തില്‍ സി.പി.എം നടത്തുന്ന കൊലപാതകം എന്ന രീതിയില്‍ പ്രചരിപ്പിച്ചത് ഏറെ വിവാദമുണ്ടാക്കിയിരുന്നു.

 

സുരേന്ദ്രന്‍റെ ഫെയ്സ്ബുക്ക് പോസ്റ്റ്

സംസ്ഥാനത്ത് വിവിധ പ്രദേശങ്ങളിൽ ഇടതുവലതു യുവജനസംഘടനകളും മതതീവ്രവാദസംഘടനകളും നടത്തുന്ന ബീഫ് മേളകൾ തടയാൻ സംസ്ഥാനസർക്കാർ അടിയന്തിര നടപടി സ്വീകരിക്കണം. ബീഫ് മേളകളിൽ വിതരണം ചെയ്യുന്ന മാംസം പലതും അംഗീകൃത ഇറച്ചിക്കടകളിൽ നിന്ന് വാങ്ങുന്നതല്ല. പലയിടത്തും പൊതുസ്ഥലത്ത് നിയമം ലംഘിച്ച് കശാപ്പു നടത്തിയാണ് മേളകൾ നടത്തുന്നത്. ജനങ്ങളിൽ ഭീതിയുളവാക്കുന്നതും അരോചകമായ നിലയിലുമാണ് കാര്യങ്ങൾ പോകുന്നത്. പ്രകോപനപരമാണ് പല പരിപാടികളും. സാമൂഹ്യവിരുദ്ധരും തീവ്രവാദികളും അവസരം മുതലെടുക്കുന്നു. ദേവസ്വം വകുപ്പ് മന്ത്രി തന്നെ പരസ്യമായി ഗോമാംസം ഭക്ഷിക്കുന്നത് ലക്ഷക്കണക്കിന് വിശ്വാസികളെ വേദനിപ്പിച്ചിരിക്കുന്നു. മന്ത്രിമാരും ഉത്തരവാദപ്പെട്ട പൊതുപ്രവർത്തകരും ഇത്തരം ഭീഭൽസമായ സമരപരിപാടികളിൽ നിന്ന് വിട്ടുനിൽക്കണം. പ്രചാരണവും സമരപരിപാടികളും ആർക്കുമാവാം. എന്നാൽ ജനങ്ങളിൽ അവമതിപ്പുളവാക്കുന്ന ആഭാസസമരങ്ങളിൽ നിന്ന് ഉത്തരവാദപ്പെട്ടവർ പിന്മാറുന്നതാണ് എല്ലാവർക്കും നല്ലത്. തിരിച്ചുള്ള പ്രകോപനങ്ങളിലേക്ക് ദേശീയപ്രസ്ഥാനങ്ങളെ മനപ്പൂർവം വലിച്ചിഴക്കരുതെന്ന് ബന്ധപ്പെട്ട എല്ലാവരോടും അഭ്യർത്ഥിക്കുന്നു.

---