പാലക്കാട്: ബി.ജെ.പി ഭൂരിപക്ഷം നേടിയ പാലക്കാട് നഗരസഭയില്‍ അധ്യക്ഷ തെരഞ്ഞെടുപ്പില്‍ ബി.ജെ.പിയുടെ മുതിര്‍ന്ന അംഗം പേരുമാറി വോട്ടുചെയ്തതിനെ തുടര്‍ന്ന് നഗരസഭയില്‍ വന്‍ ബഹളം. തെരഞ്ഞെടുപ്പ് കമ്മിഷണറുടെ നിര്‍ദേശമനുസരിച്ച് മാറിയ വോട്ട് അസാധുവായി വരണാധികാരി പ്രഖ്യാപിച്ചു. ബി.ജെ.പി നഗരസഭാധ്യക്ഷ സ്ഥാനാര്‍ഥി കെ. പ്രിയയ്ക്ക് വോട്ടുചെയ്യുന്നതിന് പകരം എല്‍.ഡി.എഫ് സ്ഥാനാര്‍ഥി ഉഷയുടെ പേര് ഏഴുതി ബി.ജെ.പി കൗണ്‍സിലര്‍ എന്‍.നടേശന്‍ ബാലറ്റ് പെട്ടിയിലിട്ടു.
അബദ്ധം പറ്റിയെന്നു പറഞ്ഞ് പെട്ടെന്ന് ബാലറ്റ് തിരികെ വാങ്ങി പ്രിയയുടെ പേരെഴുതി വോട്ടുചെയ്യുന്നതിനെ ചൊല്ലിയുള്ള തര്‍ക്കമാണ് ബഹളത്തിന് തുടക്കമിട്ടത്. വോട്ട് റദ്ദാക്കണമെന്ന് ആവശ്യപ്പെട്ട് സി.പി.എം, കോണ്‍ഗ്രസ് അംഗങ്ങള്‍ വരണാധികാരിയെ സമീപിച്ചു. അതിനെതിരേ ബി.ജെ.പിക്കാരുമെത്തി. 52 അംഗ കൗണ്‍സിലില്‍ ബി.ജെ.പിക്ക് 28 പേരാണുളളത്. 27 വോട്ട് നേടി പ്രിയ ചെയര്‍പേഴ്‌സണായി തെരഞ്ഞെടുക്കപ്പെട്ടു.