കൊല്ലം: കോര്‍പറേഷന്‍ മേയര്‍ തെരഞ്ഞെടുപ്പില്‍ ബി.ജെ.പിക്കും ഡെപ്യൂട്ടി മേയര്‍ തെരഞ്ഞെടുപ്പില്‍ കോണ്‍ഗ്രസിനും ഓരോ വോട്ടുകള്‍ അസാധുവായി.
മേയര്‍ തെരഞ്ഞെടുപ്പില്‍ ഒന്‍പത് അംഗങ്ങളുള്ള യു.ഡി.എഫും (കോണ്‍ഗ്രസ്-6, ആര്‍.എസ്.പി-3) അറ് അംഗങ്ങളുള്ള ബി.ജെ.പി.യും സ്ഥാനാര്‍ഥികളെ നിര്‍ത്തിയിരുന്നു. ബി.ജെ.പിയുടെ മേയര്‍ സ്ഥാനാര്‍ഥിയായിരുന്ന ഷൈലജക്ക് അഞ്ച് വോട്ടാണ് ലഭിച്ചത്. ബി.ജെ.പി അംഗം സജിതാനന്ദിന്റെ വോട്ട് അസാധുവായി. ഉച്ചയ്ക്ക് ശേഷം നടന്ന ഡെപ്യൂട്ടി മേയര്‍ തെരഞ്ഞെടുപ്പില്‍ ആര്‍.എസ്.പിയിലെ എം പുഷ്പാംഗദന് എട്ട് വോട്ടാണ് ലഭിച്ചത്. കോണ്‍ഗ്രസിന്റെ മേയര്‍ സ്ഥാനാര്‍ഥിയായിരുന്ന ശ്രീദേവിയയുടെ വോട്ടാണ് അസാധുവായത്. ബി.ജെ.പിയും ഡെപ്യൂട്ടി മേയര്‍ സ്ഥാനത്തേക്ക് മത്സരിച്ചിരുന്നു.
ഇതിനിടെ മേയര്‍ തെരഞ്ഞെടുപ്പ് കഴിഞ്ഞ ഉടനെ തുമ്പറ ഡിവിഷനില്‍ നിന്നുള്ള സി.പി.ഐ അംഗം തുമ്പറ സോമനെ ദേഹാസ്വാസ്ഥ്യത്തെ തുടര്‍ന്ന് ആശുപത്രിയില്‍ പ്രവേശിപ്പിച്ചു. ഒരംഗമുള്ള എസ്.ഡി.പി.ഐ തെരഞ്ഞെടുപ്പ് പ്രക്രിയയില്‍ നിന്നും വിട്ടുനിന്നു.