കാസര്‍കോട്: കാറിലെത്തിയ അജ്ഞാതസംഘം തട്ടിക്കൊണ്ടുപോയ പ്ലസ് ടു വിദ്യാര്‍ഥിയെ കണ്ടെത്തി. മഞ്ചേശ്വരത്ത് കളിയൂരിലെ അബൂബക്കറിന്റെ മകന്‍ അബ്ദുറഹ്മാന്‍ ഹാരിസിനെയാണ് കണ്ടെത്തിയത്. തട്ടിക്കൊണ്ടുപോയ സംഘം ഇന്ന് രാവിലെ മംലഗാപുരത്തെ ഒരു ബസ് സ്‌റ്റോപ്പില്‍ കുട്ടിയെ വിട്ട ശേഷം ബന്ധുക്കളെ വിളിച്ചറിയിക്കുകയായിരുന്നു. തുടര്‍ന്ന് മഞ്ചേശ്വരം പൊലിസ് കുട്ടിയെ കണ്ടെത്തി.

ജില്ലാ ആശുപത്രിയില്‍ വൈദ്യപരിശോധനക്ക് വിധേയനാക്കിയ അബ്ദുറഹ്മാന് ഹാരിസിന് കുഴപ്പമൊന്നുമില്ലെന്നാണ് ലഭിക്കുന്ന വിവരം. പരിശോധനക്ക് ശേഷം കൂടുതല്‍ വിവരങ്ങള്‍ക്കായി ഹാരിസിനെ പൊലിസ് ചോദ്യം ചെയ്‌തേക്കും. സാമ്പത്തിക ഇടപാട് സംബന്ധിച്ച തര്‍ക്കമാണ് കുട്ടിയെ തട്ടിക്കൊണ്ടുപോകുന്നതിന് ഇടയാക്കിയതെന്ന് നേരത്തേ സൂചനയുണ്ടായിരുന്നു. ഹാരിസിന്റെ അമ്മാവന്‍ ലത്തീഫും പ്രദേശത്തുകാരനായ നപ്പട്ട് റഫീഖും തമ്മില്‍ സാമ്പത്തിക കോടികളുടെ സാമ്പത്തിക ഇടപാടുണ്ടായിരുന്നു. മൂന്ന് കോടിയോളം രൂപ നല്‍കാനുണ്ടായിരുന്നതിനെ തുടര്‍ന്നാണ് കുട്ടിയെ തട്ടിക്കൊണ്ടു പോയതെന്നും തുടര്‍ന്ന് മധ്യസ്ഥ ചര്‍ച്ചക്കൊടുവില്‍ ഒന്നേകാല്‍ കോടി രൂപക്ക് പ്രശ്‌നം ഒത്തുതീര്‍പ്പായതിനെ തുടര്‍ന്നാണ് വിദ്യാര്‍ഥിയെ വിട്ടുനല്‍കിയതെന്നുമാണ് ലഭിക്കുന്ന സൂചന.

സഹോദരിക്കൊപ്പം സ്‌കൂളിലേക്ക് പോകുന്നതിനിടെ നാല് ദിവസം മുന്‍പാണ് ഹാരിസിനെ കാറിലെത്തിയ സംഘം ബലമായി പിടിച്ചുകൊണ്ടുപോയത്. വീടിന് ഒരു കിലോമീറ്റര്‍ അകലെവച്ചായിരുന്നു സംഭവം. സഹോദരിയുടെ മൊഴിയനുസരിച്ച് നാല് പേര്‍ക്കെതിരേ പൊലിസ് കേസെടുത്തിരുന്നു.