തിരുവനന്തപുരം: യൂനിവേഴ്സിറ്റി കോളജിലെ കൊലപാതക ശ്രമം ഉള്‍പ്പെടെയുള്ള വിഷയങ്ങളിലെ സര്‍ക്കാര്‍ നിലപാടില്‍ പ്രതിഷേധിച്ച് യു.ഡി.എഫ് ആഹ്വാനം ചെയ്ത സെക്രട്ടറിയറ്റ് ഉപരോധ സമരത്തിനിടെ നേതാക്കളെ പൊലിസ് അറസ്റ്റു ചെയ്തു നീക്കി. ഉച്ചക്ക് ഒന്നോടെയാണ് നേതാക്കളെ പൊലിസ് അറസ്റ്റ് ചെയ്തുനീക്കിയത്.

രാവിലെ ആറിന് ആരംഭിച്ച ഉപരോധം പത്തോടെ പ്രതിപക്ഷ നേതാവ് രമേശ് ചെന്നിത്തല ഉദ്ഘാടനം ചെയ്തിരുന്നു. സംസ്ഥാനത്ത് പൊലിസ് രാജാണ് നടക്കുന്നതെന്ന് അദ്ദേഹം പറഞ്ഞു. ആരെങ്കിലും ജീവനോടെ പൊലിസ് സ്റ്റേഷനില്‍ കയറിപ്പോയാല്‍ പിന്നീട് ശവമായി തിരച്ചുവരുന്ന സാഹചര്യമാണുള്ളത്. ഭരണ നിര്‍വഹണത്തില്‍ പൂര്‍ണമായും പരാജയപ്പെട്ട മുഖ്യമന്ത്രി പിണറായി വിജയന്‍ രാജിവെച്ചൊഴിയുന്നതാണ് നല്ലതെന്നും അദ്ദേഹം കൂട്ടിച്ചേര്‍ത്തു. എ.ഐ.സി.സി ജന. സെക്രട്ടറി കെ.സി വേണുഗോപാല്‍, മുസ്‌ലിം ലീഗ് നേതാവ് കെ.പി.എ മജീദ്, ഉമ്മന്‍ ചാണ്ടി, ജോണി നെല്ലൂര്‍, അനൂപ് ജേക്കബ്, ജോസ് കെ. മാണി തുടങ്ങിയ നിരവധി നേതാക്കള്‍ ഉപരോധത്തില്‍ പങ്കെടുക്കുന്നുണ്ട്.

അതിരാവിലെ തന്നെ എത്തിയ യു.ഡി.എഫ് പ്രവര്‍ത്തകര്‍ സെക്രട്ടറിയറ്റിലേക്ക് പ്രവേശിക്കാനുള്ള പ്രധാന ഗേറ്റുകളെല്ലാം ഉപരോധിച്ചിരുന്നു. യൂണിവേഴ്സിറ്റി കോളേജില്‍ നടന്ന അക്രമസംഭവങ്ങളിള്‍ ജുഡീഷ്യല്‍ അന്വേഷണം പ്രഖ്യാപിക്കുക, പി.എസ്.സി പരീക്ഷയുടെ വിശ്വാസ്യത വീണ്ടെടുക്കുക, ഉത്തരക്കടലാസ് ചേര്‍ച്ച അടക്കുമള്ള വിഷയങ്ങളില്‍ സി.ബി.ഐ അന്വേഷണം പ്രഖ്യാപിക്കുക, വിലക്കയറ്റം തടയുക തുടങ്ങിയ നിരവധി വിഷയങ്ങള്‍ ഉന്നയിച്ചാണ് യു.ഡി.എഫ് ഉപരോധം സംഘടിപ്പിച്ചത്. അതേസമയം സമരത്തിന്റെ പശ്ചാത്തലത്തില്‍ നഗരത്തില്‍ ഒരുക്കിയ വലിയ സുരക്ഷയുടെയും ഗതാഗത ക്രമീകരണത്തിന്റെയും ഭാഗമായി നഗരത്തില്‍ മണിക്കൂറുകളോളം വാഹന ഗതാഗതം താറുമാറായി. ഇത് ജനങ്ങളില്‍ വലിയ പ്രതിഷേധത്തിനും വഴിയൊരുക്കി.