താമരശ്ശേരി: മലയോരമേഖലയില്‍ വനം വകുപ്പ് നടത്തിയ തിരച്ചിലില്‍ മലമാന്‍ വേട്ട സംഘം അറസ്റ്റില്‍. നാലംഗ സംഘത്തെയാണ് മലമാനിന്റെ നൂറുകിലോ ഇറച്ചി സഹിതം അറസ്റ്റു ചെയ്തത്. താമരശ്ശേരി കോരങ്ങാട് വാപ്പനാംപൊയില്‍ പാറമ്മല്‍ മുഹമ്മദ് റഫീഖ്(മാനു-43), മൈലള്ളാംപാറ മട്ടിക്കുന്ന് വെള്ളിലാട്ട്പൊയില്‍ ഭാസ്‌കരന്‍(49), മൈലള്ളാംപാറ മട്ടിക്കുന്ന് പൂവന്‍മലയില്‍ വി മഹേഷ്(40), മൈലള്ളാംപാറ മട്ടിക്കുന്ന് ഉമ്മിണിക്കുന്നേല്‍ ബാബു യു.ജെ എന്നിവരെയാണ് താമരശ്ശേരി റെയ്ഞ്ച് ഫോറസ്റ്റ് ഓഫിസര്‍ സുധീര്‍ നെരോത്തിന്റെ നേതൃത്വത്തില്‍ അറസ്റ്റ് ചെയ്തത്.

റെയ്ഞ്ചിലെ കനലാട് സെക്ഷന്‍ പരിധിയില്‍ വന്യജീവി വേട്ട നടക്കുന്നുണ്ടെന്ന രഹസ്യവിവരത്തെ തുടര്‍ന്ന് നടത്തിയ അന്വേഷണത്തിലാണ് സംഘം പിടിയിലാകുന്നത്. ഇവരില്‍ നിന്നും 102 കിലോഗ്രാം മലമാന്‍ ഇറച്ചിയും പിടിച്ചെടുത്തു.