കൊച്ചി: മുന്‍ എം.പി ജോയ്‌സ് ജോര്‍ജിനെതിരായ കൊട്ടക്കമ്പൂര്‍ ഭൂമിയിടപാട് കേസ് അന്വേഷിക്കുന്ന പൊലിസുദ്യോഗസ്ഥന്‍ ഇടുക്കി സ്വദേശിയാണോ എന്നറിയിക്കാന്‍ ഹൈക്കോടതി നിര്‍ദേശം. മുന്‍പ് അന്വേഷിച്ച മൂന്നാര്‍ ഡിവൈ.എസ്.പിയായിരുന്ന അഭിലാഷ് തന്നെ അന്വേഷിച്ചാല്‍ കേസ് ശരിയായ വഴിക്ക് നീങ്ങുമോയെന്ന് സംശയമുണ്ടെന്ന് വാദിഭാഗം ആരോപിച്ചപ്പോഴായിരുന്നു നിലവിലുള്ള ഡിവൈ.എസ്.പിയുടെ വിശദാംശങ്ങള്‍ ബോധിപ്പിക്കാന്‍ കോടതി നിര്‍ദേശിച്ചത്. കേസില്‍ സി.ബി.ഐ അന്വേഷണം ആവശ്യപ്പെട്ട് നല്‍കിയ ഹരജി പരിഗണിക്കുമ്പോഴായിരുന്നു കോടതിയുടെ നിര്‍ദേശം.
കേസന്വേഷിക്കുന്ന ഡിവൈ.എസ്.പിക്കു പ്രതികളുമായി മുന്‍ പരിചയം ഉണ്ടോയെന്ന് അറിയിക്കാനും ഹൈക്കോടതി നിര്‍ദേശിച്ചത്. ജോയ്‌സ് ജോര്‍ജിനെ കുറ്റവിമുക്തനാക്കിയുള്ള റിപ്പോര്‍ട്ടായിരുന്നു മൂന്നാര്‍ ഡിവൈ.എസ്.പി തൊടുപുഴ സെഷന്‍സ് കോടതിയില്‍ സമര്‍പ്പിച്ചത്. അതേ സമയം മുന്‍പ് കേസന്വേഷിച്ചിരുന്ന ഡിവൈ.എസ്.പി അഭിലാഷ് റിട്ടയര്‍ ചെയ്‌തെന്ന് സര്‍ക്കാര്‍ കോടതിയെ അറിയിച്ചിരുന്നു.