ന്യൂഡല്‍ഹി: ഉത്തരേന്ത്യയില്‍ ശൈത്യം ശക്തമായതോടെ ഡല്‍ഹിയില്‍ കേന്ദ്ര കാലാവസ്ഥാ നിരീക്ഷണ കേന്ദ്രം ഓറഞ്ച് അലര്‍ട്ടും പഞ്ചാബില്‍ റെഡ് അലര്‍ട്ടും പ്രഖ്യാപിച്ചു. രണ്ടു ദിവസത്തേക്കാണ് പ്രഖ്യാപനം. ഡിസംബര്‍ 31, ജനുവരി ഒന്ന് ദിവസങ്ങളില്‍ ഡല്‍ഹിയില്‍ യെല്ലോ അലര്‍ട്ടും പ്രഖ്യാപിച്ചിട്ടുണ്ട്.
ഡല്‍ഹി, പഞ്ചാബ്, ഹരിയാന, ചണ്ഡിഗഢ്, ഉത്തരാഖണ്ഡ് എന്നിവിടങ്ങളില്‍ വരും ദിവസങ്ങളില്‍ കനത്ത മൂടല്‍മഞ്ഞുണ്ടാകാമെന്നും കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നല്‍കി. ഉത്തര്‍പ്രദേശിലെ ചില ഭാഗങ്ങളില്‍ വരുന്ന മൂന്നു ദിവസത്തേയ്ക്കും രാജസ്ഥാനില്‍ വരുന്ന രണ്ടു ദിവസത്തേയ്ക്കും മൂടല്‍മഞ്ഞുണ്ടാകാം. ഇന്നലെ രാവിലെ ഡല്‍ഹിയില സഫ്ദര്‍ജങ് ഭാഗത്ത് താപനില 3.6 ഡിഗ്രി സെല്‍ഷ്യസാണ് രേഖപ്പെടുത്തിയത്. 24 മണിക്കൂറിനുള്ളില്‍ ഇതില്‍ രണ്ടു ഡിഗ്രികൂടി കുറയാമെന്നും കാലാവസ്ഥാ നിരീക്ഷണ കേന്ദ്രം മുന്നറിയിപ്പ് നല്‍കിയിട്ടുണ്ട്. വരുന്ന നാലു ദിവസങ്ങളില്‍ ഡല്‍ഹിയില്‍ ശീതക്കാറ്റുണ്ടാകുമെന്നും കാലാവസ്ഥാ നിരീക്ഷണ കേന്ദ്രം അറിയിച്ചു.