ആലുവ: ഓണ്‍ലൈന്‍ തട്ടിപ്പിലൂടെ കേരളത്തില്‍നിന്നു കോടികള്‍ കവര്‍ന്ന സംഘത്തിലെ പ്രധാന പ്രതിയെ ബംഗളൂരുവില്‍നിന്ന് എറണാകുളം റൂറല്‍ പൊലിസ് പിടികൂടി. കൊല്‍ക്കത്ത സ്വദേശി മനോതോഷ് ബിശ്വാസ് (46) ആണ് പിടിയിലായത്.
ഇയാളുടെ നേതൃത്വത്തിലുള്ള സംഘം രണ്ടു മാസത്തിനിടെ കേരളത്തില്‍നിന്ന് ഒന്നരക്കോടിയിലേറെ രൂപയാണ് തട്ടിയത്. ഇതില്‍ മൂവാറ്റുപുഴ സ്വദേശിയുടെ അക്കൗണ്ടില്‍നിന്നു മാത്രം നഷ്ടപ്പെട്ടത് 85 ലക്ഷം രൂപയാണെന്ന് അന്വേഷണത്തിനു നേതൃത്വം നല്‍കുന്ന ജില്ലാ പൊലിസ് മേധാവി കെ. കാര്‍ത്തിക് പറഞ്ഞു. തൃശൂരില്‍ മൂന്നു പേരുടെ അക്കൗണ്ടുകളില്‍നിന്നായി 83.75 ലക്ഷം രൂപയും തട്ടിയെടുത്തു. ഓണ്‍ലൈനുമായി ബന്ധിപ്പിച്ചിട്ടുള്ള അക്കൗണ്ടുകളില്‍ പണമുള്ളവരുടെ ബാങ്ക് അക്കൗണ്ട് ഹാക്ക് ചെയ്യുകയാണ് സംഘം ആദ്യം ചെയ്യുന്നത്. ഇതില്‍നിന്നു യൂസര്‍ ഐ.ഡിയും പാസ്‌വേഡും സ്വന്തമാക്കും. തുടര്‍ന്നു ഫോണിലേക്കു വരുന്ന ഒ.ടി.പി നമ്പര്‍ ശേഖരിക്കുകയാണ് ഇവരുടെ ലക്ഷ്യം. അതിനു വേണ്ടി സംഘത്തിലെ ഒരാള്‍ കേരളത്തില്‍ വന്ന് വ്യാജ ആധാര്‍ കാര്‍ഡും വോട്ടേഴ്‌സ് ഐ.ഡിയും നിര്‍മിച്ച് വിവിധ മൊബൈല്‍ കമ്പനികളില്‍നിന്നും അക്കൗണ്ട് ഹോള്‍ഡറുടെ പേരില്‍ ഡ്യൂപ്ലിക്കേറ്റ് സിം കരസ്ഥമാക്കും. അതിനു ശേഷം ഈ സിമ്മിലേക്ക് ഒ.ടി.പി വരുത്തി അക്കൗണ്ടിലുള്ള തുക മുഴുവന്‍ കവരുകയാണ് ചെയ്യുന്നത്.