നീലേശ്വരം: മാര്‍ക്കറ്റ് ജങ്ഷനില്‍ ദേശീയപാതയോരത്തെ ജൈവ നഗരിക്കു സമീപത്തേക്കു മാറ്റി സ്ഥാപിച്ച പുതിയ മത്സ്യ മാര്‍ക്കറ്റ് പൊളിച്ചുനീക്കണമെന്നു കാണിച്ച് നീലേശ്വരം നഗരസഭയ്ക്ക് ദേശീയപാതാ വിഭാഗത്തിന്റെ നോട്ടീസ്. ഇതു സംബന്ധിച്ച ദേശീയപാതാ വിഭാഗം അസി.എന്‍ജിനീയറുടെ കത്ത് കഴിഞ്ഞ ദിവസമാണ് നഗരസഭാ സെക്രട്ടറിക്കു ലഭിച്ചത്.
 ഈ മാസം മൂന്നാം തീയതിയാണ് ദേശീയപാതയോരത്ത് ഓര്‍ച്ച റോഡിനു സമീപമുണ്ടായിരുന്ന മത്സ്യ മാര്‍ക്കറ്റ് ജൈവനഗരിക്കു സമീപത്തേക്ക് മാറ്റി സ്ഥാപിച്ചത്. റോട്ടറി ക്ലബ്ബാണ് നഗരസഭയ്ക്ക് ഷെഡ് നിര്‍മിച്ചു നല്‍കിയത്. എന്നാല്‍ ഈ ഷെഡ് തങ്ങള്‍ക്ക് ഉപദ്രവമായി തീരുമെന്നു കാണിച്ച് അബ്ദുല്‍ സലാം ഹാജി ഹൈക്കോടതിയില്‍ കേസ് നല്‍കിയിരുന്നു. ഇതേ തുടര്‍ന്ന് നഗരസഭാ അധികൃതരുടേയും മീന്‍ വില്‍പനക്കാരുടേയും വാദം കേള്‍ക്കാന്‍ കോടതി ദേശീയപാതാ വിഭാഗം അസി.എന്‍ജിനീയറോട് ഉത്തരവിട്ടിരുന്നു. ഇതിന്റെ തുടര്‍ നടപടി എന്ന നിലയിലാണ് ഇപ്പോള്‍ മത്സ്യ മാര്‍ക്കറ്റ് പൊളിച്ചു നീക്കണമെന്നു കാണിച്ച് നഗരസഭയ്ക്ക് നോട്ടീസ് നല്‍കിയിരിക്കുന്നത്.
ഇതോടെ 26 ഓളം മത്സ്യ വില്‍പന തൊഴിലാളികളെ എങ്ങോട്ടു മാറ്റിപ്പാര്‍പ്പിക്കുമെന്ന പ്രതിസന്ധിയിലാണ് നഗരസഭാ അധികൃതര്‍. കീറിപ്പറിഞ്ഞ പ്ലാസ്റ്റിക് ഷെഡുകളുടെ കീഴിലാണ് കഴിഞ്ഞ മാസം വരെ മത്സ്യ മാര്‍ക്കറ്റ് പ്രവര്‍ത്തിച്ചിരുന്നത്. വെയിലും മഴയുമേറ്റ് പലപ്പോഴും തൊഴിലാളികളുടെ ആരോഗ്യത്തേയും ഇതു ബാധിച്ചിരുന്നു. ഇതില്‍ നിന്നു മോചനം ലഭിച്ചതായി സന്തോഷിച്ചിരിക്കുമ്പോഴാണ് ഇരുട്ടടി പോലെ മത്സ്യ മാര്‍ക്കറ്റ് പൊളിച്ചുനീക്കാനുള്ള നോട്ടീസ് വന്നിരിക്കുന്നത്.