കൊപ്പം: വീട്ടില്‍ നിന്നും സ്‌കൂളില്‍ നിന്നും പെറുക്കിയെടുത്ത പ്ലാസ്റ്റിക് കുപ്പികള്‍ കൊണ്ട് നൂറിലധികം പാവകള്‍ നിര്‍മ്മിച്ച് സ്‌കൂള്‍ കുട്ടികള്‍. നടുവട്ടം കിഴുമുറി എ.എം.എല്‍.പി സ്‌കൂളിലെ വിദ്യാര്‍ഥികളാണ് പ്ലാസ്റ്റിക് കുപ്പികള്‍ കരവിരുതില്‍ പാവകളാക്കി മാറ്റിയത്. പ്ലാസ്റ്റിക് കുപ്പികള്‍ അലക്ഷ്യമായി വലിച്ചെറിയാതെ എങ്ങിനെ പ്രകൃതിയെ സംരക്ഷിക്കാമെന്ന പുതിയ പാഠവും വിദ്യാര്‍ത്ഥികള്‍ സ്വായത്തമാക്കി. പൊതു വിദ്യാഭ്യാസ സംരക്ഷണത്തിന്റെ ഭാഗമായാണ് ഈ പരിശീലന പരിപാടി നടന്നത്. കെ.ടി.ഹനീഫ പാവനിര്‍മ്മാണത്തിന് നേതൃത്വം നല്‍കി. തുടര്‍ന്ന് പാവനാടകവും നടന്നു. പി.ടി.എ.പ്രസിഡന്റ് ഇ.സമീര്‍ ഉദ്ഘാടനം ചെയ്തു. പ്രധാനധ്യാപിക പി.ഗിരിജ അധ്യക്ഷയായി. അധ്യാപകരായ എ.കെ.നൗഫല്‍, പി.ഓമന, എം.നസീബ പ്രസംഗിച്ചു.