വളാഞ്ചേരി: അന്താരാഷ്ട്ര വിപണിയില്‍ ലക്ഷങ്ങള്‍ വിലവരുന്ന ഹെറോയിനുമായി പശ്ചിമ ബംഗാള്‍ സ്വദേശിയും രണ്ട് കിലോ കഞ്ചാവുമായി മധുര സ്വദേശിയും കുറ്റിപ്പുറം എക്‌സൈസിന്റെ പിടിയിലായി.
ബംഗാള്‍ സ്വദേശി രഞ്ജിത്ത് മൊണ്ടല്‍ (25 ), മധുര ഉസുലാം പെട്ടി സ്വദേശി വനരാജന്‍ (38) എന്നിവരാണ് പിടിയിലായത്.
കോളജ് വിദ്യാര്‍ഥികള്‍ക്കും മറുനാടന്‍ തൊഴിലാളികള്‍ക്കും വിറ്റഴിക്കുന്നതിനു വേണ്ടി 350 ഓളം ചെറു പൊതികളിലായാണ് ഹെറോയിന്‍ സൂക്ഷിച്ചിരുന്നത്. ഇതിന് അഞ്ച് ലക്ഷം രൂപ വിലവരും.
വളാഞ്ചേരി ബസ് സ്റ്റാന്റ് പരിസരത്തു നിന്നാണ് രണ്ടുകിലോ കഞ്ചാവുമായി വനരാജന്‍ പിടിയിലായത്. വളാഞ്ചേരിയിലെ ചില്ലറ വില്‍പ്പനക്കാര്‍ക്ക് തമിഴ്‌നാട്ടില്‍നിന്ന് കഞ്ചാവ് എത്തിച്ചു കൊടുക്കുന്നത് ഇയാളാണ്. പ്രതികളെ വടകര എന്‍.ഡി.പി.എസ് കോടതി മുന്‍പാകെ ഹാജരാക്കും .