തോല്‍പ്പെട്ടി (വയനാട്): അതിമാരകമായ മയക്കുമരുന്നായ കൊക്കെയിന്‍ കൈവശംവച്ച കുറ്റത്തിനു യുവാവ് അറസ്റ്റില്‍.
മലപ്പുറം ചങ്ങരംകുളം സ്വദേശിയായ താഴത്തെ മാന്തടത്തില്‍ വീട്ടില്‍ എം. വിമല്‍രാജാ (22) ണ് അറസ്റ്റിലായത്. എക്‌സൈസ് ചെക്‌പോസ്റ്റില്‍വച്ച് പുലര്‍ച്ചെ മാനന്തവാടി എക്‌സൈസ് ഇന്‍സ്‌പെക്ടര്‍ ടി. ഷറഫുദ്ദീനും സംഘവും നടത്തിയ പരിശോധനയിലാണ് ഇയാള്‍ പിടിയിലായത്.
ഇയാളുടെ പക്കല്‍നിന്ന് 1.15 ഗ്രാം കൊക്കെയിന്‍ കണ്ടെത്തി. ഷൂവിനുള്ളില്‍ ഒളിപ്പിച്ച നിലയിലായിരുന്നു ഇത്. മുംബൈ, ഗോവ, ബംഗളൂരു എന്നിവിടങ്ങളില്‍നിന്നും വിദേശ പൗരന്മാരില്‍നിന്നും മാത്രം ലഭ്യമാകുന്ന ഈ മയക്കുമരുന്ന് ഗ്രാമിന് ഇരുപതിനായിരം രൂപ തോതിലാണ് വിപണനം നടത്തിവരുന്നത്. പ്രിവന്റീവ് ഓഫിസര്‍ സുരേഷ് വെങ്ങാലിക്കുന്നേല്‍, സിവില്‍ എക്‌സൈസ് ഓഫിസര്‍ സനൂപ് കെ.എസ്, ഹാഷിം കെ, ഷാഫി ഒ, സുരേഷ് എം എന്നിവരും പരിശോധനാ സംഘത്തിലുണ്ടായിരുന്നു.