റാഞ്ചി: ജാര്‍ഖണ്ഡില്‍ മാവോ വാദികള്‍ റെയില്‍പാളം ബോംബ് വച്ച് തകര്‍ത്തു. ബൊക്കാറോക്കടുത്ത് ഗിരിധി ജില്ലയിലാണ് മാവോ വാദികള്‍ റെയില്‍പാളം തകര്‍ത്തത്. നിരവധി വാഹനങ്ങളും അഗ്നിക്കിരയാക്കി. ചിചാങ്കി- കര്‍മബാദ് സ്റ്റേഷനുകള്‍ക്കിടയിലാണ് ട്രാക്ക് ബോംബ് വച്ച് തകര്‍ത്തത്. ദുംരി ഭാഗത്താണ് വാഹനങ്ങള്‍ക്കു നേരെ ആക്രമണമുണ്ടായത്. തകര്‍ന്ന റെയില്‍പാളം പുനസ്ഥാപിക്കാനുള്ള ജോലി തുടരുകയാണെന്ന് റെയില്‍വെ അറിയിച്ചു. റെയില്‍ സര്‍വീസ് പൂര്‍ണമായും തടസപ്പെട്ട സാഹചര്യത്തില്‍ യാത്രക്കാരെ ബസ് മാര്‍ഗമാണ് പലയിടത്തും എത്തിക്കുന്നത്.