തിരുവനന്തപുരം: കാന്‍സര്‍ ബാധിതയ്ക്ക് രക്തപരിശോധനയിലൂടെ രോഗമില്ലെന്ന് റിപ്പോര്‍ട്ട് നല്‍കിയതിനെത്തുടര്‍ന്ന് പൂട്ടിച്ച സ്വകാര്യ ലാബ് വീണ്ടും തുറന്ന സംഭവത്തില്‍ അന്വേഷിച്ച് ഉടന്‍ റിപ്പോര്‍ട്ട് സമര്‍പ്പിക്കണമെന്ന് മനുഷ്യാവകാശ കമ്മിഷന്‍ അധ്യക്ഷന്‍ ജസ്റ്റിസ് ആന്റണി ഡൊമിനിക് ആവശ്യപ്പെട്ടു.
പരാതിയെ തുടര്‍ന്ന് പൊലിസ് പൂട്ടിച്ച ലാബ് വ്യാഴാഴ്ചയാണ് വീണ്ടും പ്രവര്‍ത്തനം തുടങ്ങിയത്. മെഡിക്കല്‍ കോളജ് സി.ഐക്കാണ് കമ്മിഷന്‍ നിര്‍ദേശം നല്‍കിയത്. 12 തവണ കിമോതെറാപ്പിക്ക് വിധേയയായ നൂറനാട് സ്വദേശിനിയുടെ രക്തം തിരുവനന്തപുരം മെഡിക്കല്‍ കോളജിന് സമീപത്തെ ലാബില്‍ പരിശോധിച്ചപ്പോഴാണ് കാന്‍സര്‍ ഇല്ലെന്ന് പരിശോധനാ റിപ്പോര്‍ട്ട് നല്‍കിയത്.
ബുധനാഴ്ചയാണ് പരിശോധന നടത്തിയത്. എറണാകുളത്തെ ആശുപത്രിയില്‍ ചികിത്സ തുടരുന്ന വ്യക്തി തിരുവനന്തപുരത്ത് വിദഗ്ദ്ധ ചികിത്സക്കെത്തിയപ്പോഴാണ് മെഡിക്കല്‍ കോളജ് പരിസരത്തെ ലാബില്‍ നിന്ന് രക്തം പരിശോധിപ്പിച്ചത്. ഇതേ ലാബിന്റെ കോട്ടയം ശാഖയില്‍ നിന്ന് നടത്തിയ പരിശോധനയിലാണ് രോഗമില്ലാത്ത രജനി എന്ന വീട്ടമ്മക്ക് അര്‍ബുദമുണ്ടെന്ന് റിപ്പോര്‍ട്ട് നല്‍കിയതെന്ന് മനുഷ്യാവകാശ പ്രവര്‍ത്തകനായ പി.കെ രാജു നല്‍കിയ പരാതിയില്‍ പറയുന്നു. ഇതേ വിഷയത്തില്‍ പരാതിക്കാരന്‍ നല്‍കിയ മറ്റൊരു പരാതി കമ്മിഷന്റെ പരിഗണനയിലാണ്.