കോഴിക്കോട്: സംഘര്‍ഷത്തിലൂടെ ശബരിമലയെ മറ്റൊരു അയോധ്യയാക്കാന്‍ നീക്കം നടക്കുന്നതായി കെ.പി.സി.സി പ്രസിഡന്റ് മുല്ലപ്പള്ളി രാമചന്ദ്രന്‍. കാലിക്കറ്റ് പ്രസ്‌ക്ലബില്‍ നടന്ന മീറ്റ് ദ പ്രസില്‍ സംസാരിക്കുകയായിരുന്നു അദ്ദേഹം. കുത്സിത ശക്തികളുടെ ഇത്തരം ശ്രമം അനുവദിക്കില്ല.
ശബരിമല വിഷയത്തില്‍ കോണ്‍ഗ്രസ് വിശ്വാസികള്‍ക്കൊപ്പമാണ്. ശബരിമല സെന്‍സിറ്റീവ് വിഷയമാണ്. സര്‍ക്കാര്‍ തീ കൊണ്ടാണ് കളിക്കുന്നത്. വിഷയത്തില്‍ സമവായമുണ്ടാക്കാന്‍ ശ്രമിക്കണം.
ഇതിനെ പ്രശ്‌നവല്‍ക്കരിച്ചാല്‍ സ്ഥാപിത താല്‍പര്യക്കാര്‍ക്കാണ് ഗുണമുണ്ടാവുക. കലാപമുണ്ടാക്കി മുതലെടുക്കാന്‍ അവര്‍ ശ്രമിക്കും. അതിനാലാണ് വിഷയം വിവാദമാക്കരുതെന്ന് പറയുന്നത്.
കോടതിവിധികളെ എന്നും ബഹുമാനിച്ച ചരിത്രമാണ് കോണ്‍ഗ്രസിനുള്ളത്. സ്ത്രീകള്‍ ഉള്‍പ്പെടെ വിശ്വാസികള്‍ തെരുവിലിറങ്ങുകയും അഭിപ്രായസമന്വയം ഉണ്ടാക്കാന്‍ സാധിക്കാതെ വരികയും ചെയ്ത സാഹചര്യത്തില്‍ സര്‍ക്കാര്‍ റിവ്യൂ ഹരജി നല്‍കണം.
കോണ്‍ഗ്രസ് കക്ഷിചേരുമോ എന്ന കാര്യം അപ്പോള്‍ തീരുമാനിക്കും. വിശ്വാസികളുടെ വികാരം മുതലെടുക്കാനാണ് വര്‍ഗീയ ശക്തികളുടെ ശ്രമം. ശബരിമല വിഷയത്തില്‍ സര്‍വകക്ഷി യോഗം വിളിക്കാന്‍ സര്‍ക്കാര്‍ തയാറാകണം.
പ്രളയത്തിന്റെ മറവില്‍ ഡിസ്റ്റിലറികളും ബ്രൂവറികളും അനുവദിച്ചതില്‍ ജുഡിഷ്യല്‍ അന്വേഷണം നടത്തണം. പ്രതിപക്ഷ നേതാവ് രമേശ് ചെന്നിത്തലയുടെ ചോദ്യങ്ങള്‍ക്ക് ഉത്തരം നല്‍കാന്‍ മന്ത്രി തയാറാകുന്നില്ല. അദ്ദേഹം പറഞ്ഞു. ഡി.സി.സി പ്രസിഡന്റ് ടി. സിദ്ദീഖ്, പി. ശങ്കരന്‍ എന്നിവരും മുല്ലപ്പള്ളിക്കൊപ്പം ഉണ്ടായിരുന്നു.