തിരൂര്‍: കേര ള പ്രീമിയര്‍ ലീഗ് ഫുട്‌ബോള്‍ ടൂര്‍ണമെന്റില്‍ കെ.എസ്.ഇ.ബി.തിരുവനന്തപുരവും എഫ്.സി തൃശൂരും ഫൈനലിലെത്തി.
ഇന്നലെ നടന്ന സെമി പോരാട്ടങ്ങളില്‍ തിരൂര്‍ സാറ്റിനെ പെനാല്‍റ്റി ഷൂട്ടൗട്ടിലാണ് കെ.എസ്.ഇ.ബി പരാജയപ്പെടുത്തിയപ്പോള്‍ എഫ്.സി ഗോകുലത്തിനെ പരാജയപ്പെടുത്തിയാണ് എഫ്.സി തൃശൂര്‍ ഫൈനല്‍ ബര്‍ത്ത് ഉറപ്പിച്ചത്. നാളെ നടക്കുന്ന ഫൈനലില്‍ കെ.എസ്.ഇ.ബിയെ എഫ്.സി തൃശൂര്‍ നേരിടും. മലപ്പുറം കോട്ടപ്പടി സ്റ്റേഡിയത്തില്‍ രാത്രി 9.30 മുതലാണ് കലാശപ്പോരാട്ടം.
കെ.എസ്.ഇ.ബി- തിരൂര്‍ സാറ്റ് മത്സരത്തില്‍ കളിയുടെ മുഴുവന്‍ സമയവും ഇരു ടീമുകളും ഗോളടിക്കാതെ സമനില പാലിക്കുകയായിരുന്നു. ഷൂട്ടൗട്ടില്‍ ഒന്നിനെതിരേ നാല് ഗോളുകള്‍ക്കാണ് കെ.എസ്.ഇ.ബി വിജയം സ്വന്തമാക്കിയത്. കെ.എസ്.ഇ.ബിയുടെ ജോബി ജസ്റ്റിന്‍ കളിയിലെ താരമായി.
നിശ്ചിത സമയവും അധികസമയവും ഗോള്‍രഹിതമായി നിന്ന മത്സരത്തില്‍ സഡന്‍ ഡെത്തിലാണ് എഫ്.സി തൃശൂര്‍ ഗോഗുലം എഫ്.സിയെ പരാജയപ്പെടുത്തിയത്. അഞ്ചിനെതിരേ ആറ് ഗോളുകള്‍ക്കാണ് തൃശൂര്‍ വിജയം പിടിച്ചത്. ഗോകുലം എഫ്.സിക്കായി മിറോണ്‍ മെന്റസ്, ബെല്ല റസാക്ക്, മുഹമ്മദ് സലീം, ജാവേദ് ഷൈക്ക്, ബിജേഷ് ബാലന്‍ എന്നിവര്‍ ഗോള്‍ നേടിയപ്പോള്‍ എഫ്.സി തൃശൂരിനായി സെബിന്‍ വര്‍ഗീസ്, സനീഷ് വി.പി, ഹസീബ് കെ.വി, സോമി പി.പി, ആഷിക്, രാജേസ് എസ് എന്നിവര്‍ ഗോള്‍ നേടി.