മട്ടാഞ്ചേരി: കൊച്ചി ഫിഷറീസ് ഹാര്‍ബറില്‍നിന്ന് മത്സ്യബന്ധനത്തിനുപോയി കാണാതായ ബോട്ടുകളില്‍ ഇരുപതെണ്ണം കൂടി ഇന്നലെ തിരിച്ചെത്തി. വിവരമൊന്നും ലഭിക്കാതിരുന്ന നൂറ്റിയന്‍പത് ബോട്ടുകളില്‍ ഇരുപതെണ്ണമാണ് ഇന്നലെ തിരിച്ചെത്തിയത്. എന്നാല്‍ ഏകദേശം തൊണ്ണൂറോളം ബോട്ടുകളെക്കുറിച്ച് യാതൊരു വിവരവും ലഭിച്ചിട്ടില്ല. ബാക്കിയുള്ളവ പലയിടങ്ങളിലായി കയറിയതായി അധികൃതര്‍ക്ക് വിവരം ലഭിച്ചിട്ടുണ്ട്.
ന്യൂനമര്‍ദ്ദം കുറഞ്ഞതായുള്ള വിവരം ആശ്വാസമേകുന്നുണ്ടെങ്കിലും ഒമാന്‍ തീരത്തേക്കാണ് പോകുന്നതെന്നത് ആശങ്കക്കിടയാക്കിയിട്ടുണ്ട്. വിവരം ലഭിക്കാത്ത ബോട്ടുകള്‍ കൂടുതലും ഒമാന്‍ തീരത്തോട് ചേര്‍ന്നാണുള്ളതെന്നാണ് വിവരം. ഇതാണ് ആശങ്കയുളവാക്കുന്നത്. ലക്ഷദ്വീപില്‍ നിന്നും അഞ്ഞൂറ് നോട്ടിക്കല്‍ മൈല്‍ അകലെ വടക്ക് പടിഞ്ഞാറായി മൂന്നുമേഖലകളില്‍ ബോട്ടുകളുള്ളതായും മടങ്ങിയെത്തിയ ബോട്ടുകളില്‍നിന്ന് വിവരം ലഭിച്ചിട്ടുണ്ട്.
ബോട്ടുകളേയും തൊഴിലാളികളേയും രക്ഷപ്പെടുത്താനുള്ള നടപടി അടിയന്തരമായി സ്വീകരിക്കണമെന്നാവശ്യപ്പെട്ട് ലോങ് ലെയിന്‍ ആന്‍ഡ് ഗില്‍നെറ്റ് ബോട്ട് ബൈയിങ് ഏജന്റ്‌സ് അസോസിയേഷന്‍ സെക്രട്ടറി എം. മജീദ് അധികൃതര്‍ക്ക് നിവേദനം നല്‍കിയിട്ടുണ്ട്.