ന്യൂഡല്‍ഹി:ആംആദ്മി പാര്‍ട്ടിയിലെ ഒരു എം.എല്‍.എ കൂടി അറസ്റ്റിലായി. നരേലയിലെ പ്രതിനിധിയായ ശരത് ചൗഹാനാണ് അറസ്റ്റിലായത്.

പാര്‍ട്ടി പ്രവര്‍ത്തകയുടെ ആത്മഹത്യയുമായി ബന്ധപ്പെട്ടാണ് അറസ്റ്റ്.ജൂലൈ 19നാണ് വടക്കന്‍ ഡല്‍ഹി സ്വദേശിയായ യുവതി വിഷം കഴിച്ച് ആത്മഹത്യയ്ക്ക് ശ്രമിച്ചത്. തുടര്‍ന്ന് ആശുപത്രിയില്‍ ചികിത്സയിലിരിക്കെ മരിക്കുകയായിരുന്നു.ഇതുമായി ബന്ധപ്പെട്ട് രമേശ് ഭരദ്വാജ് എന്ന സഹപ്രവര്‍ത്തകന്‍ നേരത്തെ അറസ്റ്റിലായിരുന്നു.

ഇയാളെ സഹായിച്ചുവെന്ന ആരോപണത്തിലാണ് ഇപ്പോള്‍ എം.എല്‍.എ അറസ്റ്റിലായത്. വിവിധ കേസുകളില്‍ ഇതുവരേയായി 12 ആപ്പ് എം.എല്‍.എമാരെ പൊലിസ് അറസ്റ്റ് ചെയ്തിട്ടുണ്ട്.

എന്നാല്‍ കേന്ദ്ര സര്‍ക്കാര്‍ തങ്ങളുടെ പ്രവര്‍ത്തകരെയും ജനപ്രതിനിധികളെയും കള്ളക്കേസുകളില്‍ കുടുക്കുകയാണെന്നാണ് ആം ആദ്മി പറയുന്നത്. അതിനിടെ മുഖ്യമന്ത്രി കെജ്‌രീവാള്‍  ഇപ്പോള്‍ അവധിയെടുത്ത് ധ്യാന കേന്ദ്രത്തിലാണുള്ളത്.