റിയാദ്: സഊദിയില്‍ വ്യാപകമായി മരങ്ങള്‍ നട്ടു പിടിപ്പിക്കാന്‍ നടപടികളുമായി അധികൃതര്‍. രാജ്യത്താകമാനം വിവിധ തരത്തിലുള്ള മരങ്ങള്‍ നട്ടു പിടിപ്പിച്ച് വനവല്‍ക്കരണം നടപ്പാക്കാനാണ് അധികൃതര്‍ ഒരുങ്ങുന്നത്. ഇതിന്റെ ഭാഗമായി രാജ്യത്താകമാനം 2.3 മില്ല്യന്‍ വൃക്ഷതൈകള്‍ നടാന്‍ പദ്ധതികള്‍ തയ്യാറാക്കി.

പരിസ്ഥിതി ജലവകുപ്പ് മന്ത്രാലയത്തിന്റെ നേതൃത്വത്തില്‍ കാര്‍ഷിക സീസണായ ഒക്‌ടോബര്‍ ഒന്നിന് ആരംഭിച്ച വനവല്‍ക്കരണ പദ്ധതി അടുത്ത വര്‍ഷം ഏപ്രില്‍ വരെ നീണ്ടു നില്‍ക്കും. വിവിധ ഗവണ്‍മെന്റ്് ഏജന്‍സികളുടെ സഹകരണത്തോടെയാണ് രാജ വ്യാപക വനവല്‍ക്കരണം നടപ്പാക്കുന്നത്.
ഡിസംബര്‍ 15 നകം എട്ട് മേഖലകളിലായി 1.3 മില്ല്യന്‍ മരങ്ങള്‍ വെച്ചുപിടിപ്പിക്കുമെന്ന് പരിസ്ഥിതി വകുപ്പ് അണ്ടര്‍ സെക്രട്ടറി ഡോ. ഉസാമ ഫഖീഹ പറഞ്ഞു. മദീനയില്‍ 50,000, തബൂക്കില്‍ 35000, റിയാദില്‍ 10,000 ഖസീമില്‍ 20,000, ഉത്തര അതിര്‍ത്തിയില്‍ 15,000, ബിഷയില്‍ 140,000 ജീസാനില്‍ 170,000 അല്‍ അഹ്‌സയില്‍ 150,000 മരങ്ങള്‍ വീതമാണ് വെച്ചു പിടിപ്പിക്കുക. കൂടാതെ, അടുത്ത വര്‍ഷം മാര്‍ച്ച് ഒന്നിനും ഏപ്രില്‍ പതിനഞ്ചിനുമിടയിലെ ഒന്നര മാസക്കാലയളവില്‍ 6200000 മരങ്ങളാണ് റിയാദ് മേഖലയില്‍ നട്ടു പിടിപ്പിക്കുക. അല്‍ ഖര്‍ജ് ഗവര്‍ണറേറ്റില്‍ 90,000 മരങ്ങളും ശഖറ പ്രവിശ്യയില്‍ 80,000 മരങ്ങളും അഫീഫ് ഡിസ്ട്രിക്ട്ല്‍ 2000000 മരങ്ങളും സലീല്‍ ഗവര്‍ണറേറ്റില്‍ 2500000 വീതവും മരങ്ങള്‍ നടും.