തിരുവനന്തപുരം: സര്‍വകലാശാല പരീക്ഷയുടെ ഉത്തരക്കടലാസുകള്‍ കോളേജില്‍ നിന്ന് കടത്തിയിരുന്നതായി ശിവരഞ്ജിത് സമ്മതിച്ചതായി പൊലിസ്. യൂനിവേഴ്‌സിറ്റി കോളേജിലെ അക്രമസംഭവങ്ങളുമായി ബന്ധപ്പെട്ട് പൊലിസ് ശിവരഞ്ജിത്തിന്റെ വീട്ടില്‍ നടത്തിയ പരിശോധനയില്‍ 16 കെട്ട് ഉത്തരക്കടലാസുകള്‍ കണ്ടെത്തിയിരുന്നു.

ഉത്തരക്കടലാസുകള്‍ കോളേജിലെത്തിച്ച് ഇറക്കിവച്ചപ്പോഴാണ് കടത്തിക്കൊണ്ടുപോയതെന്നും ശിവരഞ്ജിത്ത് പറഞ്ഞതായും പൊലിസ് അറിയിച്ചു. തെളിവെടുപ്പിനായി ശിവരഞ്ജിത്തിനെ ഇന്ന് കോളേജിലേക്ക് കൊണ്ടുവന്നിരുന്നു.
ഉത്തരക്കടലാസുകള്‍ എവിടെനിന്നാണ് എടുത്തതെന്നും ശിവരഞ്ജിത് പൊലിസുകാര്‍ക്ക് കാട്ടിക്കൊടുത്തു.
ഇയാള്‍ പരീക്ഷയെഴുതിയ ഉത്തരക്കടലാസുകള്‍ ലഭിക്കാന്‍ പൊലിസ് തിങ്കളാഴ്ച യൂനിവേഴ്‌സിറ്റി അധികൃതര്‍ക്ക് കത്ത് നല്‍കും. ഉത്തരക്കടലാസുകള്‍ കൈയെഴുത്ത് പരിശോധനക്കായി ഫോറന്‍സിക് ലാബിലേക്കയക്കുമെന്നും പൊലിസ് പറഞ്ഞു.