സ്വന്തം ലേഖകന്‍

കൊണ്ടോട്ടി: കരിപ്പൂര്‍ വിമാനത്താവള സ്വകാര്യവല്‍ക്കരണം സംബന്ധിച്ച വാര്‍ത്തകള്‍ വരുന്നതിനിടെ ആസ്തിവിവരങ്ങള്‍ പരിശോധിച്ച് റിപ്പോര്‍ട്ട് നല്‍കാന്‍ നിര്‍ദേശം. കേന്ദ്രവ്യോമയാന മന്ത്രാലയമാണ് നിലവിലെ ആസ്തി, ശേഷി, വരുമാനം, സര്‍വിസുകളുടെയും യാത്രക്കാരുടെയും എണ്ണം തുടങ്ങിയവ സംബന്ധിച്ചുള്ള വിവരങ്ങള്‍ എയര്‍പോര്‍ട്ട് അതോറിറ്റിയോട് തേടിയത്. ഇവ വൈകാതെ എയര്‍പോര്‍ട്ട് അതോറിറ്റി കൈമാറും. കരിപ്പൂര്‍ ഉള്‍പ്പെടെ രാജ്യത്തെ 10 വിമാനത്താവളങ്ങളാണ് സ്വകാര്യവല്‍ക്കരണ പട്ടികയില്‍ ഉള്‍പ്പെട്ടിട്ടുള്ളത്. എന്നാല്‍ ഇതിന് അന്തിമ തീരുമാനം ആയിട്ടില്ല.
തിരുവനന്തപുരം വിമാനത്താവളത്തിന് പിറകെയാണ് കരിപ്പൂരും സ്വകാര്യവല്‍ക്കരിക്കാന്‍ കേന്ദ്രത്തിന്റെ ശ്രമം. തിരുവനന്തപുരം വിമാനത്താവളം സ്വകാര്യവല്‍ക്കരിക്കുന്നതിനെതിരേ സര്‍ക്കാര്‍ കടുത്ത പ്രതിഷേധത്തിലാണ്.
എയര്‍പോര്‍ട്ട് അതോറിറ്റിക്ക് കീഴില്‍ ലാഭകരമായി പ്രവര്‍ത്തിക്കുന്ന കരിപ്പൂര്‍ വിമാനത്താവളം സ്വകാര്യവല്‍ക്കരിക്കുന്നതിനെതിരേ ജീവനക്കാരില്‍നിന്നും ജനപ്രതിനിധികളില്‍നിന്നും കടുത്ത പ്രതിഷേധവും ഉയര്‍ന്നിട്ടുണ്ട്. വിമാനത്താവളം സ്വകാര്യമേഖലയിലാകുന്നതോടെ നിലവിലെ എയര്‍ട്രാഫിക് കണ്‍ട്രോള്‍, കസ്റ്റംസ്, എമിഗ്രേഷന്‍, കേന്ദ്രസുരക്ഷാ സേന തുടങ്ങിയവ ഒഴികെ മുഴുവന്‍ മേഖലയിലും സ്വകാര്യവല്‍ക്കരണമുണ്ടാകും. നിലവിലെ എയര്‍പോര്‍ട്ട് അതോറിറ്റി ജീവനക്കാര്‍ക്ക് തൊഴില്‍ നഷ്ടപ്പെടുകയോ പുതിയ കമ്പനിയുടെ കീഴില്‍ തൊഴിലെടുക്കേണ്ടിവരികയോ ചെയ്യും.
അതേസമയം, സ്വകാര്യ മേഖലയില്‍ പ്രവര്‍ത്തിക്കുന്ന കണ്ണൂര്‍, കൊച്ചി വിമാനത്താവങ്ങളോട് പിടിച്ചു നില്‍ക്കാന്‍ സ്വകാര്യവല്‍ക്കരണം ആശ്വാസമാവുമെന്ന വിലയിരുത്തലുമായും സംഘടനകള്‍ രംഗത്തെത്തിയിട്ടുണ്ട്.