ബകു: ബകുവിലെ ലങ്കാറന്‍ തുറമുഖത്തിന് സമീപത്ത് മുങ്ങിയ ഇറാന്‍ ചരക്കുകപ്പലില്‍ നിന്ന് രണ്ട് ഇന്ത്യക്കാര്‍ ഉള്‍പ്പെടെ ഒന്‍പത് പേരെ രക്ഷപ്പെടുത്തി. രക്ഷപ്പെട്ട മറ്റ് ഏഴുപേര്‍ ഇറാന്‍ പൗരന്‍മാരാണ്. ഇറാന്റെ ഷബഹാങ് കപ്പലാണ് കഴിഞ്ഞദിവസം അസര്‍ബൈജാനു സമീപം മുങ്ങിയത്.
കപ്പല്‍ മുങ്ങിത്തുടങ്ങിയ ഉടന്‍ തന്നെ ജീവനക്കാര്‍ അസര്‍ബൈജാന്‍ മറൈന്‍ അക്കാദമിയുടെ സഹായം അഭ്യര്‍ഥിക്കുകയായിരുന്നു. മറൈന്‍ അക്കാദമി രണ്ട് ഹെലികോപ്റ്ററുകള്‍ അയച്ചാണ് ഇവരെ രക്ഷിച്ചത്. ജീവനക്കാരെ രക്ഷപ്പെടുത്തിയതിന് പിന്നാലെ കപ്പല്‍ അസരി കടലില്‍ പൂര്‍ണമായി മുങ്ങുകയായിരുന്നു. ഇറാനിലെ അന്‍സി തുറമുഖത്തുനിന്ന് റഷ്യയിലേക്ക് ടൈല്‍സുമായി പോവുകയായിരുന്നു കപ്പല്‍.
ഇറാന്‍ ഒരു ഭാഗത്തും അമേരിക്കയും ബ്രിട്ടനും സഖ്യരാജ്യങ്ങളും മറുഭാഗത്തുമായി മേഖലയില്‍ കൊമ്പുകോര്‍ക്കല്‍ തുടരുന്നതിനിടെയാണ് ഇറാന്‍ ചരക്കുകപ്പല്‍ അപകടത്തില്‍പ്പെട്ടത്.