ഹരിപ്പാട്: ഓട്ടോറിക്ഷയില്‍ വിദേശമദ്യം കടത്തുന്നതിനിടയില്‍ യുവാക്കളെ എക്‌സൈസ് സംഘം അറസ്റ്റ് ചെയ്തു. പ്രധാന പ്രതി ഓടി രക്ഷപെട്ടു. ബിജു, ആദര്‍ശ് എന്നിവരെയും ഇവര്‍ മദ്യം കടത്താന്‍ ഉപയോഗിച്ച ഓട്ടോറിക്ഷയും ആറ് ലിറ്റര്‍ മദ്യവുമാണ് പിടികൂടിയത്.
മുഖ്യപ്രതി പത്തിയൂര്‍കാല മുളയ്ക്കല്‍ കിഴക്കതില്‍ കൊച്ചുപൊടി എന്ന് വിളിക്കുന്ന സജി ഓടി രക്ഷപെട്ടു.
കഴിഞ്ഞ ദിവസം വൈകിട്ട് പള്ളിപ്പാട് ചില്ലറ മദ്യവില്‍പ്പനശാലയുടെ സമീപത്തുനിന്നും പിന്തുടര്‍ന്ന് കുരീക്കാട് ജംഗ്ഷനില്‍ വെച്ചാണ് ഇവരെ എക്‌സൈസ് സംഘം പിടികൂടിയത്.
ആലപ്പുഴ അസിസ്റ്റന്റ് എക്‌സൈസ് കമ്മീഷ്ണര്‍ ചന്ദ്രപാലിന് ലഭിച്ച രഹസ്യ വിവരത്തിന്റെ അടിസ്ഥാനത്തില്‍ ഹരിപ്പാട് എക്‌സൈസ് ഇന്‍സ്‌പെക്ടര്‍ എന്‍ മഹേശന്റെ നേതൃത്വത്തില്‍ അസിസ്റ്റന്റ് ഇന്‍സ്‌പെക്ടര്‍ എച്ച് ഷാജി, സിവില്‍ എക്‌സൈസ് ഓഫിസര്‍ അന്‍സു പി. ഇബ്രഹിം എന്നിവര്‍ ചേര്‍ന്നാണ് ഇവരെ പിടികൂടിയത്.